એલમાઉ : અમેરિકાના પ્રમુખ જો બાઈડેન અને પશ્ચિમ દેશોની ત્રણ દિવસની જી-7 સમિટનો રવિવારે જર્મનીના બાવેરિયન આલ્પ્સ ખાતે આરંભ થયો હતો.આ દેશોએ ચીનના બેલ્ટ એન્ડ રોડ પ્રોજેક્ટની સામે વૈશ્વિક ઈન્ફ્રાસ્ટ્રક્ચર પાર્ટનરશિપ માટે 600 અબજ ડોલર ઊભા કરવાની પહેલ કરી છે.આ રકમ 2027 સુધીમાં ઊભું કરાશે.રશિયા-યુક્રેન યુદ્ધની પડનારી આર્થિક અસરો અને રશિયાને કઈ રીતે પાઠ ભણાવવો તેની રણનીતિ નક્કી કરવા આ દેશો મંથન કરશે.બ્રિટનના વડાપ્રધાન બોરીસ જોન્સને નેતાઓને ચેતવ્યા હતા કે થાકવાનું નથી.
બાઈડેન જી-7ના આ ઈન્ફ્રાસ્ટ્રક્ચર પ્લાનને ખુલ્લો મૂકશે. જી-7ના કેટલાક દેશો તેમના પોતાના અલગ પ્લાન મૂકશે.ચીનથી ચિંતિત આ દેશોએ સૌપ્રથમ ગયા વર્ષે આ પ્રોજેક્ટ વહેતો કર્યો હતો અને હવે તેને નવા શીર્ષક‘પાર્ટનરશિપ ફોર ગ્લોબલ ઈન્ફ્રાસ્ટ્રક્ચર એન્ડ ઈન્વેસ્ટમેન્ટ’ હેઠળ લોન્ચ કરી રહ્યા છે.અગાઉ તેને“બિલ્ડ બેક બેટર વર્લ્ડ”નામ આપવામાં આવ્યું હતું.અમેરિકાના અધિકારીઓ સતત કહેતા આવ્યા છે કે ચીનની ઈન્ફ્રાસ્ટ્રક્ચર પહેલ વિવધ દેશોને દેવામાં ડૂબાડવા માટે છે અને તેનો સૌથી વધુ ફાયદો ચીનને જ થવાનો છે.
યોગાનુયોગ સમિટ શરૂ થઈ ત્યારે જ રશિયે યુક્રેનની રાજધાની કીવ પર મિસાઈલ હુમલો કર્યો હતો.બાઈડેને પ્રી-સમિટ મીટિંગ દરમિયાન કહ્યું હતું કે “આપણે બધાએ સંગઠિત થવું પડશે કારણ કે પુટિન શરૂઆતથી જ મોકો શોધી રહ્યા છે કે નાટો અને જી-7 દેશોમાં ભાગલા પડશે.પરંતુ આપણે એવું નહીં થવા દઈએ.”
જી-7 મીટિંગના આરંભિક સત્રમાં સભ્ય દેશોએ પુટિન સામે વિવિધ પ્રકારે પ્રહાર કર્યા હતા.બોરીસ જોન્સને કહ્યું હતું કે “શું આપણે હવે જેકેટ પહેરવા જોઈએ કે કેમ.આપણે બતાવવું પડશે કે આપણે પુટિન કરતાં વધુ આકરા છીએ.”કેનેડાના વડાપ્રધાન જસ્ટિન ટ્રુડોએ પુટિન પર કટાક્ષ કરતા કહ્યું હતું કે “ખુલ્લા શરીરે હોર્સબેક રાઈડ” રશિયાના પ્રમુખ વ્લાદિમિર પુટિનના શર્ટ વગરના અનેક ફોટો પ્રસિદ્ધ થયા છે જે સંદર્ભમાં ટ્રુડોએ આમ કહ્યું હતું.
