એજન્સી, દિલ્હી
દિલ્હીમાં છેલ્લા 24 કલાકમાં કોરોનાના પાંચ નવા કેસ સામે આવ્યા છે. જેમાંથી એક દર્દી ગત દિવસોમાં વિદેશથી પરત ફર્યો હતો. આમ દિલ્હીમાં કોરોનાથી સંક્રમિત લોકોની સંખ્યા વધીને 35 થઇ ગઈ છે. દિલ્હીના મુખ્યમંત્રીએ જાણકારી આપતા જણાવ્યું હતું કે, ભલે દેશમાં લોકડાઉન પરિસ્થિતિ હોય પરંતુ આવશ્યક વસ્તુઓની ઉણપ સર્જાવા દઈશું નહિ. આ પહેલા કોરોના વાયરસથી સંક્રમણ પર નજર રાખતા અને જરૂરી ચીજ વસ્તુઓની સમીક્ષા રાખતા બુધવારે ફરીથી આ મામલે દિલ્હીમાં લેફટન્ટ ગવર્નર અનિલ બૈઝલની ઓફિસમાં એક બેઠક થઇ હતી. બેઠકમાં મુખ્યમંત્રી અરવિંદ કેજરીવાલ સહીત અન્ય ઉચ્ચ અધિકારીઓ હાજર હતા. બેઠકમાં મૂળભૂત સુવિધાઓ અને જરૂરી વસ્તુઓની ઉપલબ્ધતા જાળવી રાખવા માટે સમીક્ષા થઇ હતી.
બેઠકમાં મુખ્યમંત્રી અરવિંદ કેજરીવાલે જણાવ્યું હતું કે, રાજધાનીમાં કોઈપણ પ્રકારની વસ્તુઓની કમી થવા દઈશું નહિ. મૂળભૂત જરૂરિયાતો પૂર્ણ કરવી સરકારની જવાબદારી છે. દૂધ, શાકભાજી, જરૂરી દવાઓ જરૂર પડ્યે તમારા ઘરે પહોંચાડવામાં આવશે.
કેજરીવાલે જણાવ્યું હતું કે, દિલ્હી સરકાર, એલજી અને દિલ્હી પોલીસે સાથે મળીને નિર્ણય કર્યો છે કે અમે એક જ યુનિટની જેમ કાર્ય કરીશું. વડાપ્રધાન મોદીના મંગળવારના સંબોધન બાદ લોકોની ભીડ ઉમટી પડી હતી. એવામાં લોકડાઉનનો મતલબ શું રહ્યો? એવું કરવાથી કોરોના સામેની લડાઈ નબળી થશે. દિલ્હીમાં કોઈપણ વસ્તુઓની ખોટ આવશે નહિ અને કોઈપણ હાલતમાં ઘટાડો જોવા માટે મળશે નહિ તેવો કેજરીવાલે વિશ્વાસ વ્યક્ત કર્યો હતો.
મુખ્યમંત્રીએ જણાવ્યું હતું કે, તંત્રે નિર્ણય કર્યો હતો કે દૂધ, શાકભાજી, દવા, માસ્ક વેચનારા અને સેનિટાઇઝર બનાવવા વાળા લોકોને ઈ પાસ આપવામાં આવશે. આજે સાંજ સુધી દરેકને ઈ પાસ આપવામાં આવશે. દિલ્હી સરકાર સુનિશ્ચિત કરશે કે જરૂરી વસ્તુઓની દુકાન ખોલશે અને પર્યાપ્ત માત્રામાં સામાન આપવામાં આવશે તેવી વ્યવસ્થા કરવામાં આવશે.
કેજરીવાલે જણાવ્યું હતું કે, વડાપ્રધાન મોદીએ મંગળવારે જે સંપૂર્ણ દેશમાં લોકડાઉનનો જે નિર્ણય કર્યો છે તે જરૂરી છે. દરેક વ્યક્તિઓના સ્વાસ્થ્ય માટે જરૂરી છે. લોકો ઘરમાં જ રહે તેવી વિનંતી.
