આજકાલ સોશિયલ મીડિયાનો વ્યાપ ખુબ જ વધ્યો છે. આજની યુવાપેઢી સોશિયલ મીડિયા પાછળ એટલી બધી ગાંડી છે કે ના પુછો વાત… જેના કારણે ઘણી વખત યુવતીઓની ભોગવવાનો વારો આવે છે. હાલ તાપી જિલ્લામાં ત્રણ યુવતીનું સોશિયલ મીડિયા ઉપર ફેક એકાઉન્ટ બનાવવામાં આવ્યું હોવાની ઘટના સામે આવી છે.
તાપી જિલ્લામાં એક યુવકે 3 યુવતીઓનું સોશિયલ મીડિયા પર ફેક એકાઉન્ટ બનાવીને આ યુવતીઓને સોશિયલ મીડિયા પર સંપર્ક કર્યો હતો. ત્યારબાદ મિત્રતા કેળવ્યા બાદ એડિટ કરેલા બીભત્સ ફોટા અપલોડ કરી મહિલાને શારીરિક-માનસિક ત્રાસ આપવાના કેસમાં તાપી જિલ્લાની ટેકનીકલ સર્વેલન્સ ટીમ તેમજ એલસીબી પોલીસ સ્ટાફના માણસોએ સમગ્ર પ્રકરણની તપાસ કરી મૂળ બોટાદના ખામળા ગામના અને સુરતના અમરોલી ખાતે રહેતા એક યુવાનની ધરપકડ કરી છે.
આ ઘટનામાં મળતી માહિતી પ્રમાણે. તાપી જિલ્લાના વ્યારા ખાતે ત્રણ યુવતીનું સોશિયલ મીડિયા ઉપર અજાણ્યા ઇસમે બોગસ આઇડી બનાવી યુવતીને બદનામ કરવાના ઈરાદે તેમના આઇડી ઉપર બીભત્સ ફોટા અપલોડ કરી દીધા હતા. જે અંગે યુવતીએ ગત 19મી ફેબ્રુઆરીના રોજ વ્યારા પોલીસ સ્ટેશનમાં ઇન્ફોર્મેશન ટેકનોલોજી એક્ટ કલમ 66(b)69 મુજબ અજાણ્યા ઈસમ વિરુદ્ધ ફરિયાદ નોંધાવી હતી.
આ ગુનાની તપાસ દરમિયાન તાપી જિલ્લા એલસીબી તેમજ વ્યારા પોલીસ અને ટેકનિકલ સર્વેલન્સ ટીમે મહત્વની ભૂમિકા ભજવી હતી. આ ગુનાનો આરોપી 21 વર્ષીય જગદીશભાઈ પ્રકાશ ભાઈ મકવાણા કે જે મૂળ બોટાદના ખામળા ગામનો રહેવાસી છે અને હાલ રીલાયન્સ નગર હાઉસિંગ કોલોની અમરોલી સુરત ખાતે રહે છે. તેને ઝડપી પાડી જેલના સળીયા પાછળ ધકેલી દીધો છે.
આ વિકૃત યુવક યુવતીઓના ઈન્સ્ટ્રાગ્રામ પર આઇડી બનાવી ફોટા અપલોડ કર્યા બાદ દોસ્ત બની યુવતી સાથે દીદી કહી વાત કરતો હતો અને બીજી તરફ બીજી આઈડી પરથી બીભત્સ ફોટા દૂર કરવા હોય તો યુવતી પાસે કોલ કરી બિભત્સ ફોટા બતાવવાની માંગણી કરતો હતો. અગાઉ પણ આ યુવક વિરુદ્ધ બોટાદ તેમજ સુરતના એક પોલીસ સ્ટેશનમાં ગુનો નોંધાઈ ચુક્યા છે. વારંવાર એક જ ગુનો આચરતો આ આરોપીની તપાસ તાપી પોલીસ કરી રહી છે.
સમગ્ર સોશિયલ મીડિયામાં જગદીશ જેવા અનેક સાતીર યુવતીઓને હેરાન કરતા હોવાના કિસ્સા બની ચુક્યા છે, ત્યારે સોશિયલ મીડિયાનો દુરુપયોગ કરી શારીરિક અને માનસિક ત્રાસ આપતો આ જગદીશ મકવાણા તાપી પોલીસના સકંજામાં આવી ચુક્યો છે. ભોગ બનનાર યુવતીઓ સંદેશ સમક્ષ પોતાની આપવીતી કહી જગદીશ મકવાણા સામે કડકમાં કડક કાર્યવાહી કરવાની માંગ કરી રહી છે.
