– એમેઝોન, ફ્લિપકાર્ટ જેવી ઇ કોમર્સ કંપનીઓને સરકારે ડિલિવરીની છૂટ આપી
એજન્સી, નવી દિલ્હી
કેન્દ્ર સરકારે એમેઝોન, ફ્લિપકાર્ટ અને સ્નેપડિલ જેવી ઇ કોમર્સ કંપનીઓને આગામી તા. 20મી એપ્રિલથી મોબાઇલ ફોન,ટીવી,રેફ્રિજરેટર્સ,લેપટોપ અને સ્ટેશનરી સહિતની ચીજવસ્તુઓનું વેચાણ કરવાની છૂટ આપી છે.ઇ કોમર્સ સેકટરને એક બહુ મોટી રાહત રૂપે સરકારે તેમને આવશ્યક ઉપરાંત હવે બિનઆવશ્યક ચીજોના વેચાણની છૂટ પણ આપી દીધી છે.
અત્યાર સુધી આ કંપનીઓને ફૂડ આઇટમ્સ ઉપરાંત મેડિકલ ઉપકરણો જેવી ચીજના વેચાણની જ છૂટ હતી.જોકે, દેશવ્યાપી લોકડાઉનના કારણે પાસ મેળવવામાં મુશ્કેલી તથા ડિલિવરી સ્ટાફની અછતના કારણે ઇ કોમર્સ કંપનીઓની કામગીરી લગભગ ઠપ થઇ ગઇ હતી.
આ છૂટ આપતી વખતે જોકે એવી સ્પષ્ટતા પણ કરવામાં આવી છે કે ઇ કોમર્સ કંપનીઓની ડિલિવરી વાન્સ માટે સ્થાનિક સત્તાવાળાઓની જરૂરી મંજૂરીઓ લેવાની અનિવાર્ય રહેશે.કેન્દ્રીય ગૃહ સચિવ અજય ભલ્લાએ આગામી તા. ત્રીજી મે સુધી લંબાવાયેલાં લોકડાઉન અંગે ગાઇડલાઇન જારી કર્યાના બીજા દિવસે ગૃહ મંત્રાલયના એક સિનિયર અધિકારીએ આ અંગે સ્પષ્ટતા કરી હતી.ઇ કોમર્સ સેકટરમાં સ્ટોરેજ અને ડિલિવરી સેક્ટર સાથે બહુ મોટી સંખ્યામાં લોકો જોડાયેલા છે. આ તમામની રોજગારી જાળવવા તથા સેક્ટરને ફરી કાર્યરત કરવાના ઉદ્દેશથી આ સ્પષ્ટતા કરવામાં આવી છે.
