બેન્ક, NBFC, વીમા સેક્ટરમાં વેલ્યૂએશનમાં સૌથી ~56,810 કરોડનું ધોવાણ થયું
એજન્સી > નવી દિલ્હી
સેન્સેક્સ 30 અને નિફ્ટી 50 ઈન્ડેક્સમાં તાજેતરના દિવસોમાં મોટાપાયે ધોવાણ થઈ ગયું છે. તેની સીધી અસર સરકાર સંચાલિત વીમા કંપની લાઈફ ઈન્સ્યોરન્સ કોર્પોરેશન(LIC) ઓફ ઈન્ડિયાને થઈ છે. છેલ્લાં અઢી મહિનાના કડાકામાં તેના ઈન્વેસ્ટમેન્ટમૂલ્યમાં ~1.9 લાખ કરોડનું તાર્કિક નુકસાન(નોશનલ લોસ) થયું છે. મતલબ કે તે સમગ્ર પોર્ટફોલિયોમાં રહેલા તમામ શેર આજે જ વેચી દે તો તેને આટલું નુકસાન થાય. વાસ્તવમાં તેણે વેચ્યા નથી.
ઈક્વિટીમાં મોટાપાયે ઈન્વેસ્ટમેન્ટ કરવા માટે જાણીતી એલઆઈસી અનેક લિસ્ટેડ કંપનીઓમાં નોંધપાત્ર રોકાણ ધરાવે છે. સરકાર એલઆઈસીનો આઈપીઓ લાવવાની તૈયારી કરી રહી છે તેવા સમયમાં તેના પોર્ટફોલિયોમાં મોટાપાયે ધોવાણ થઈ ગયું છે. એલઆઈસીનું લિસ્ટેડ કંપનીઓમાં જે હોલ્ડિંગ છે તેનું મૂલ્ય ડિસેમ્બર 2019ના અંતે ~6.02 લાખ કરોડ હતું, જેનું મૂલ્ય ઘટીને અત્યારે ~4.14 લાખ કરોડ થઈ ગયું છે. આમ, તેનો માર્ક-ટુ-માર્કેટ લોસ ~1.88 લાખ કરોડનો થયો છે. આમ, અઢી મહિનાના આ ગાળામાં તેના રોકાણનું મૂલ્ય 31 ટકા ઘટી ગયું છે.
S&P BSE 500 ઈન્ડેક્સની 209 કંપનીઓના સ્ટડીનું આ તારણ છે, જે કંપનીઓમાં એલઆઈસીનું 1 ટકાથી વધુ હોલ્ડિંગ ડિસેમ્બર 2019ના અંતે હતું. બીએસઈ લિસ્ટેડ કંપનીઓના કુલ માર્કેટ કેપના 65 ટકા માર્કેટ કેપ આ કંપનીઓનું છે. એલઆઈસીનું જે સેક્ટરમાં રોકાણ છે તેમાં બેન્ક, NBFC અને વીમા કંપનીઓના સેક્ટરમાં વેલ્યૂએશનમાં સૌથી 30 ટકા (~56,810 કરોડનું) ધોવાણ થયું છે. ઓઈલ અને ગેસ સેક્ટરમાં (~36,020 કરોડ), સિગારેટ ઉત્પાદકો (~17,374 કરોડ), આઈટી(~15,826 કરોડ), મેટલ (~12,045 કરોડ), ઓટોમોબાઈલ (~11,329 કરોડ) અને ઈન્ફ્રાસ્ટ્રક્ચર (~10,669 કરોડ)નું ધોવાણ થયું છે.
