રૂ. 110 કરોડની ડિપોઝીટમાં માત્ર 80 લાખ ટેક્સ,આ તે કેવો ભ્રષ્ટાચાર….
કલામંદિરના સમગ્ર કેસમાં રૂ. 110 કરોડની ડિપોઝીટનો ઉલ્લેખ છે અને તેને માટે રૂ. 80 લાખના ટેક્સમાં સેટલમેન્ટના પ્રયાસો આદરી દેવાયા હતાં.હકીકતમાં એવા આક્ષેપ થઈ રહ્યાં છે કે રૂ. 110 કરોડની ડિપોઝીટ પેટે કાયદેસર રીતે જ 33 ટકા ટેક્સ ભરવાનો થતો હોય છે.એટલે કે અંદાજે 36 કરોડ રૂપિયા જેટલો ટેક્સ ભરવો પડે.તો બીજો એવો દાવો પણ કરવામાં આવી રહ્યો છે કે નોટબંધી વેળા રૂ. 110 કરોડની જે ડિપોઝીટ બતાવવામાં આવી છે તે પેનલ્ટીને પાત્ર છે.જેથી કલામંદિરે પેનલ્ટી સાથે કાયદેસર રીતે રૂ. 167 કરોડ ટેક્સ ભરવાનો થાય છે.ત્યારે સ્વાભાવિક રીતે જ માત્ર રૂ. 80 લાખમાં કેસ સેટલ કરવાની વાત ચોંકાવી દેનારી છે.
—————————-
સો-બસો નહીં અંદાજે 5000 કરોડની આસપાસનો નોટબંધીનો ખેલ હોવાની ચર્ચા
કલામંદિરના સેટલમેન્ટ કેસની ચર્ચા સપાટી ઉપર આવતાં નોટબંધીના જુના પોપડા પણ હવે ઉખડવા લાગ્યા છે.એવી ચર્ચા જાહેરમાં આવી છે કે શહેરના કેટલાક જ્વેલર્સ દ્વારા આવું કૌભાંડ આચરાયું હતું.જેમાં પ્રતિબંધિત કરાયેલી રૂ. 500 અને રૂ. 1000ની નોટો સ્વીકારીને ઊંચા ભાવે સોનુ વેચવામાં આવ્યું હતું.ત્યારબાદ વેચાણની રકમને ડિપોઝીટ બતાવીને ટેક્સ ચોરીના ખેલ ખેલાયા હતાં.એક અંદાજ મુજબ સુરતના જ્વેલર્સ દ્વારા આચરાયેલું કૌભાંડ સેંકડો કરોડોમાં નહીં પરંતુ અંદાજે 5000 કરોડનું છે.જેથી જો સીબીઆઈ કે ઈડી દ્વારા સમગ્ર પ્રકરણની તલસ્પર્શી તપાસ કરવામાં આવે તો નોટબંધીનું ખુબ મોટું કૌભાંડ બહાર આવે તેવી ચર્ચાએ જોર પકડ્યું છે.
