– ઇન્ડસ્ટ્રીયલ એરિયામાં 70 % ઉદ્યોગોમાં રીસેશનને લઈ પાણી કાપની નહિવત અસર વર્તાશે
– ઉકાઈ નહેર વિભાગ દ્વારા સમારકામ માટે શતડાઉન લેવાયું
– નોટીફાઈડ રહેણાંકમાં પાણી સમસ્યા સર્જાવાના એંધાણ
અંકલેશ્વર નોટીફાઈડ વિસ્તારમાં ઉકાઈ નહેરના સમારકામના કારણે 29 દિવસનો પાણી કાપ મૂકવામાં આવ્યો છે.નોટીફાઈડ રહેણાંક વિસ્તારમાં 2 પાળીના બદલે હવે એક પાળીમાં પાણી મળશે.ત્રણ કલાકનો પાણી કાપ રહેણાંકમાં અને ઇન્ડસ્ટ્રીઝમાં 16 કલાકનો પાણી કાપ મુકાયો છે.
ઉકાઈ જમણા કાંઠા નહેર વિભાગ દ્વારા નહેરોના સમારકામ અને નવીનીકરણને લઇ પ્રતિ વર્ષની જેમ ચાલુ વર્ષે 29 દિવસનું શટડાઉન લેવામાં આવ્યું છે. 25 ડિસેમ્બર 2022 થી 25 જાન્યુઆરી 2023 સુધી નહેર સંપૂર્ણ બંધ રહેવાના કારણે જળ સંકટ સર્જાઈ શકે છે.નહેર વિભાગ દ્વારા શટડાઉન 5 દિવસ પાછળ ઠેરવીને ઔદ્યોગિક,રહેણાંક અને ખેડૂતોને પૂરતા પ્રમાણમાં પાણી આપી દેવામાં આવ્યું છે.જો કે અંકલેશ્વર નોટીફાઈડ અને પાલિકા પાસે 30 દિવસના જ પાણી સ્ટોરેજની કેપેસીટી છે.જે વચ્ચે જો શટડાઉન લંબાઈ તો ભર શિયાળે લોકોને પાણી માટે વલખા મારવા પડી શકે છે.નોટીફાઈડ તળાવમાં હાલ પાણીનું લેવલ 20.45 આર.એલ. એટલે કે 4.95 મીટર સુધી છે.ઔદ્યોગિક વિસ્તારમાં 40 એમ.એલ.ડી પાણી જરૂરિયાત પ્રતિ દિવસ હોય છે. જો કે નહેર વિભાગ દ્વારા જરૂરિયાત કરતા ઓછું પાણી આપવામાં આવે છે.જેને લઇ વધારાના પાણીની જરૂરિયાત વર્ષો થી નોટીફાઈડ વિસ્તાર ને સતાવી રહી છે.પાછલા વર્ષોના બોધપાઠ લઇ નોટીફાઈડ નિર્દિષ્ટ વિસ્તારમાં ઉદ્યોગોને 24 કલાકના બદલે સવારે 10 થી સાંજે 5 કલાક સુધી એટલે 7 કલાક પાણી આપવામાં આવશે.અને 17 કલાકનો પાણીનો કાપ આપવામાં આવ્યો છે.જ્યારે રહેણાંક વિસ્તારમાં સવારે 3 ને સાંજે 3 કલાક એમ 6 કલાક પાણી આપવામાં આવતું હતું.જે હવે એક ટાઈમમાં સવારે 6 થી 9 કલાક અપાશે.
હાલ ઔદ્યોગિક વસાહતમાં ક્રિસમસ વેકેશન અને વૈશ્વિક મંદી વચ્ચે રીસેસન ચાલી રહ્યું છે.જેને લઇ 70 % ઉદ્યોગો મંદ પડ્યા છે.જે વચ્ચે પાણી જરૂરિયાત ઓછી રહેતા ઔદ્યોગિક વસાહતમાં આવેલી કંપનીમાં સમસ્યા નહિવત જોવા મળશે.
