– આ અગાઉ અતીક અહેમદ અને અશરફની હત્યા પહેલા 12 એપ્રિલે EDએ દરોડા પાડ્યા હતા
પ્રયાગરાજ, તા. 15 જૂન 2023, ગુરૂવાર : ગુરુવારે સતત બીજા દિવસે પણ ED અતીક અહેમદના નજીકના ગણાતા લોકોના ઠેકાણા પર દરોડા પાડી રહી છે.પ્રયાગરાજ સહિત અનેક શહેરોમાં ગુરુવારે સતત બીજા દિવસે દરોડા પાડવામાં આવી રહ્યા છે. બુધવારે EDની ટીમે ચાર શહેરોમાં અતીક અહેમદના નજીકના મિત્રોના બે નોંધાયેલા ઠેકાણા પર દરોડા પાડ્યા હતા.
EDએ બુધવારે લખનૌ, પ્રયાગરાજ,નોઈડા અને દિલ્હીમાં દરોડા પાડ્યા હતા.સૂત્રોના જણાવ્યા પ્રમાણે દરોડામાં કંપનીઓમાં ટ્રાન્ઝેક્શન સંબંધિત સંવેદનશીલ દસ્તાવેજો અને કંપનીઓમાં લેવડ-દેવડના દસ્તાવેજો મળી આવ્યા હતા.આ અગાઉ અતીક અહેમદ અને અશરફની હત્યા પહેલા 12 એપ્રિલે EDએ દરોડા પાડ્યા હતા.પ્રયાગરાજમાં 12 એપ્રિલે અતીક અહેમદના વકીલ ખાન સૌલત હનીફ,પૂર્વ ધારાસભ્ય અને બિલ્ડર આસિફ જાફરી,બિલ્ડર સંજીવ અગ્રવાલ અને માફિયાના એકાઉન્ટન્ટ સીતારામ શુક્લા સહિત ઘણા લોકોને ત્યાં દરોડા પાડ્યા હતા.
રિયલ એસ્ટેટ બિઝનેસ સાથે સંકળાયેલા અતિક અહેમદના નજીકના સંબંધીઓના ઠેકાણા પર દરોડાનો બીજો રાઉન્ડ ચલાવવામાં આવી રહ્યો છે. EDની આ કાર્યવાહી ગુરુવારે સતત બીજા દિવસે પણ ચાલુ છે. EDએ વિદેશી ચલણની નોટ ગણવાના બે મશીનો,લગભગ 74 લાખ રૂપિયા રોકડા,લાખોની કિંમતના ઘરેણાં અને 200 થી વધુ બેંક ખાતાઓની વિગતો એકત્ર કરી હતી. EDએ આતિક અહેમદ વિરુદ્ધ મની લોન્ડરિંગનો કેસ નોંધ્યો હતો.
જો કે, લગભગ 18 મહિના પહેલા થયેલી એક કાર્યવાહીને બાદ કરતાં અતીક અહેમદના કેસમાં ED હજુ પણ મૌન હતી.સૂત્રોના જણાવ્યા પ્રમાણે EDએ પ્રયાગરાજ અને લખનૌ સહિત અડધા ડઝન શહેરોમાં અતીકની સો કરોડથી વધુની સંપત્તિ શોધી કાઢી છે.પ્રયાગરાજ,લખનૌ અને નોઈડામાં અતીકની ત્રણ બેનામી પ્રોપર્ટીની પણ ઓળખ કરવામાં આવી છે. ED ટૂંક સમયમાં આ સંપત્તિઓને જપ્ત કરવાની તૈયારી કરી રહ્યું છે.
