– પેટ્રોલના ભાવે સર્વોચ્ચ સપાટી વટાવતા કેન્દ્રનો બચાવ કેન્દ્રને ગ્રાહકોની ચિંતા છે,મહારાષ્ટ્ર, કેરળ સહિત નવ રાજ્યોએ વેટના દરોમાં કોઇ ઘટાડો કર્યો નથી : કેન્દ્રીય મંત્રી પુરી
નવી દિલ્હી : કેન્દ્રીય પેટ્રોલિયમ મંત્રી હરદીપસિંહ પુરીએ રાજ્યસભામાં પેટ્રોલના ભાવને લઇને કેટલીક સ્પષ્ટતા કરી હતી.પુરીએ ભારત અને અન્ય દેશોમાં પેટ્રોલના ભાવમાં કેટલા ટકાનો વધારો થયો છે તેની જાણકારી આપી હતી.તેમણે દાવો કર્યો હતો કે અમેરિકા,કેનેડા,બ્રિટન,ફ્રાંસ,સ્પેન અને શ્રીલંકાની સરખામણીએ ભારતમાં પેટ્રોલની કિમતોમાં માત્ર પાંચ ટકાનો જ વધારો થયો છે.
પુરીના દાવા મુજબ અન્ય દેશોમાં રિપ્રેઝેંટેટિવ પીરિયડ દરમિયાન પેટ્રોલની કિમતોમાં 50થી લઇને 58 ટકાનો વધારો થયો છે જ્યારે ભારતમાં માત્ર પાંચ ટકાનો જ વધારો થયો છે.કેન્દ્રીય મંત્રીએ ભાવ વધારાનો બચાવ એવા સમયે કર્યો છે જ્યારે ઘણા મહિનાથી પેટ્રોલની કિમતો 100 રૂપિયા જેટલી થઇ ગઇ છે જેને પગલે વિપક્ષ વારંવાર આ મુદ્દો ઉઠાવી રહ્યો છે.
કેન્દ્રીય મંત્રીએ સાથે એમ પણ કહ્યું હતું કે નવ એવા રાજ્યો છે કે જ્યાં વેટના દરમાં કોઇ જ ઘટાડો નથી કરવામાં આવ્યો,આ રાજ્યોમાં મહારાષ્ટ્ર,કેરળ,આંધ્ર પ્રદેશ, તેલંગાણાનો પણ સમાવેશ થાય છે.આ રાજ્યો એવા છે કે જ્યાં વેટનો દર ન ઘટાડવામાં આવતા પેટ્રોલ અને ડિઝલની કિમતોમાં કોઇ ખાસ ઘટાડો નથી જોવા મળી રહ્યો.રશિયા અને યુક્રેન વચ્ચે યુદ્ધ ચાલી રહ્યું છે.
અમેરિકા સહિતના કેટલાક દેશોએ રશિયા પાસેથી ક્રૂડ ઓઇલની ખરીદી પર પ્રતિબંધ મુકી દીધો છે.એવામાં રશિયાએ ભારે ડિસ્કાઉન્ટ સાથે અન્ય દેશોને ક્રૂડ ઓઇલ પુરૂ પાડવાની ઓફર કરી છે.માટે પુરીએ કહ્યું હતું કે હાલ ભારત રશિયાની સાથે ચર્ચા કરી રહ્યું છે.કેન્દ્ર સરકાર લોકોને પેટ્રોલ અને ડિઝલના ઉંચા ભાવથી રાહત આપવા માટે દરેક પ્રકારના પ્રયત્નો કરવા માટે તૈયાર છે.
