– અરવલ્લી બાયડના અપક્ષના ધારાસભ્ય કેસરિયા રંગમાં રંગાયા…
– પહેલા પણ ભાજપમાં હતો,આજે પણ ભાજપમાં છું : MLA ધવલસિંહ ઝાલા
રાજ્યમાં વિધાનસભાની ચૂંટણીના પાંચ મહિના બાદ પણ ભાજપમાં ભરતી મેળો યથાવત રહ્યો છે.ભારે બહુમતીથી જીત મેળવ્યા બાદ ભાજપનો દબદબો વધી રહ્યો છે.હવે બાયડના અપક્ષના ધારાસભ્યએ કેસરિયો ધારણ કર્યો છે.આજે વિધીવત રીતે ભાજપમાં જોડાયા હતા.
અરવલ્લી જિલ્લાના બાયડના અપક્ષના ધારાસભ્ય ધવલસિંહ ઝાલાએ કેસરિયો ધારણ કર્યો છે અને આજે વિધીવત રીતે ભાજપમાં જોડાયા હતા.આ તકે મિડીયા સાથે વાત કરતાં ધારાસભ્ય ધવલસિંહ ઝાલાએ જણાવ્યુ હતુ કે ભારતીય જનતા પાર્ટીના કેસરિયામાં પહેલેથી રંગાયેલો જ હતો.અને ભૂતકાળમાં પણ પાર્ટી સાથે કામ કર્યુ છે અને ભવિષ્યમાં પણ કરવાનો છું એટલે આમાં કંઇ નવુ નથી.ચૂંટણી પત્યા પછી કાર્યકરો સાથે બેઠક કરી હતી. અને નિર્ણય કર્યો ત્યારે બધાનો એક જ મત હતો કે સરકાર ભાજપની છે અને આપણે સાથે રહીને કામ કરવાનું છે.પહેલા દિવસથી મે ભાજપનો વિરોધ કર્યો નથી અને ભાજપ સાથે જ જોડાયેલો છું.લોકસભામાં ગુજરાતની તમામ બેઠક પર કમળ ખિલવાનું છે એ નિશ્ચિત છે.
મહત્વનું છે કે વિધાનસભાની ચૂંટણીમાં બાયડ બેઠક પરથી ટીકીટ ન મળતા અપક્ષ ઉમેદવારી કરીને જીત મેળવી હતી.અત્રે ઉલ્લેખનીય છે અરવલ્લીમાં મુખ્યમંત્રી ભૂપેન્દ્ર પટેલના કાર્યક્રમમાં ધારાસભ્ય ધવલસિંહ ઝાલા હાજર રહ્યા હતા.
