અમદાવાદ : અમદાવાદમાં ભારે ગરમીના કારણે બપોરના સમયે બહાર નીકળતા વાહનચાલકો માટે શહેર ટ્રાફિક વિભાગે મહત્વનો નિર્ણય લીધો છે.જેમાં આગામી બે દિવસ એટલે કે શનિ- રવિ શહેરના ૬૦ ેજેટલા ટ્રાફિક સિગ્નલ બપોરે ૧ થી ૪ વાગ્યા દરમિયાન બંધ રહેશે.ગરમીમાં રસ્તા પર ટ્રાફિક સિગ્નલ શરૂ હોવાને કારણે વાહનચાલકોને ભારે મુશ્કેલી પડતી હતી.જેને ધ્યાનમાં લઇને આ નિર્ણય લેવાયો છે.
અમદાવાદ શહેરમાં ચાલુ વર્ષે ભારે ગરમીને કારણે સતત હીટ વેવ અને તાપમાન ૪૪ ડીગ્રી સુધી જવાને કારણે વાહનચાલકો પરેશાન થતા હતા.જેમાં ટ્રાફિક સિગ્નલ પર સતત ભર તડકામાં ઉભા રહેવાને કારણે હીટ સ્ટ્રોકના પણ બનાવો બનતા હતા.આ તમામ બાબતને લઇને અમદાવાદ ટ્રાફિક પોલીસને રજૂઆત કરવામાં આવી હતી કે ટ્રાફિક સિગ્નલને બપોરના સમયે બંધ રાખવામાં આવે.જે અનુસંધાને ટ્રાફિક વિભાગના અધિકારીઓની બેઠક મળી હતી.જેમાં મહત્વનો નિર્ણય લેવાયો છે કે શનિ અને રવિવારે બપોરના એક થી ચાર દરમિયાન શહેરના ૬૦ ેજેટલા ટ્રાફિક સિગ્નલ બંધ રાખવામાં આવશે.જે બે દિવસની ટ્રાયલ બાદ રિપોર્ટના આધારે સિગ્નલ બંધ રાખવાના દિવસો લંબાવવાનો નિર્ણય કરવામાં આવશે.
