અમદાવાદ : રાજ્યમાં કોરોનાના કેસોમાં વધારો નોંધાયો છે.મંગળવારે રાજ્યમાં એક્ટિવ કેસ 4156 થયા છે,જેમાં કોવિડના નવા 577 કેસનો સમાવેશ થાય છે.કોરોનાના કેસોમાં સતત ચાલુ રહેલા વધારામાં એક્ટિવ કેસમાં 32નો વધારો જોવા મળ્યો છે.અલબત્ત,સાજા થવાના કેસોમાં પણ ખાસ્સો સુધારો થયો છે.જોકે,મંગળવારે ગાંધીનગર અને વલસાડના કોરોના સંક્રમિત એક-એક દર્દીનું મૃત્યુ નિપજતાં રાજ્યમાં અત્યાર સુધીનો કુલ મૃતાંક 10,950 થયો છે. મંગળવારે 633 દર્દીએ કોરોનાને મ્હાત આપી છે.
અમદાવાદ શહેરમાં કોરોના સંક્રમિત દર્દીની સંખ્યામાં નવા 62 કેસનો ઉમેરો થયો છે અને કેસો અઢીસોને પાર કરી ગયા છે.ગઈકાલના 185 કેસ મંગળવારે વધીને 247 જ્યારે ગ્રામ્યના પાંચ મળી કુલ 252 કેસ નોંધાયા છે.સુરત શહેરમાં 67 અને જિલ્લાના 12 મળી કુલ 79 કેસ,મહેસાણામાં 31 કેસ,વડોદરા શહેરમાં 31 અને જિલ્લામાં કોરોનાના નવા 6 કેસ નોંધાયા છે.રાજ્યના 12 જિલ્લામાં કોરોનાનો એક પણ કેસ નોંધાયો નથી.જોકે,નવસારી અને વલસાડમાં પાણીના પ્રકોપ વચ્ચે જ્યારે ભાવનગરમાં કોરોનાના નવા દર્દીઓની સંખ્યા વધી રહી છે.
છેલ્લા 24 કલાકમાં નોંધાયેલા નવા 4156 એક્ટિવ કેસમાં અમદાવાદ સિવાયના અન્ય મહાનગરોની સ્થિતિ જોઈએ તો ભાવનગર મહાનગરપાલિકામાં 28 જ્યારે જિલ્લામાં 10 કેસ,પાટણમાં 27,નવસારીમાં 15, વલસાડમાં 11 જ્યારે જામનગર અને કચ્છમાં નવા 9-9 કેસ નોંધાયા છે.રાજકોટ મહાનગરમાં 7,ખેડા અને વડોદરામાં 6-6,આણંદ,ભરૂચ,દેવભૂમિ દ્વારકા,ગીર સોમનાથ અને સુરેન્દ્રનગરમાં 4-4 કેસ નોંધાયા છે.અમરેલી અને બનાસકાંઠામાં 3-3,જામનગર શહેરમાં 9 અને જિલ્લામાં બે કેસ જ્યારે મોરબી,સાબરકાંઠા અને તાપીમાં 1-1 એક-એક કેસ નોંધાયા છે.સોમવારના 426 દર્દી સામે મંગળવારે 633 દર્દી કોરોનાને મ્હાત આપીને સાજા થયા છે જ્યારે કુલ એક્ટિવ કેસમાંથી 4156 દર્દીની સ્થિતિ સ્ટેબલ દર્શાવાઈ છે જ્યારે ત્રણ દર્દી વેન્ટિલેટર પર છે.
રાજ્યમાં અત્યારસુધીમાં કુલ 12,23,903 દર્દી સારવાર લઈને ડિસ્ચાર્જ થયા છે.દક્ષિણ ગુજરાતના નવસારી,વલસાડ સહિતના વિસ્તારોમાં પૂરની સ્થિતિ પ્રવર્તી રહી છે.છતાં કોરોનાના નવા કેસોમાં વધારો થઈ રહ્યો છે.અમદાવાદમાં પણ રથયાત્રા બાદ કોરોનાના કેસોમાં સતત વધારો થઈ રહ્યો છે.ચોમાસાની મોસમને કારણે વેક્સિનેશનની કામગીરી યથાવત રહી છે,પરંતુ ટેસ્ટિંગની કામગીરી ધીમી પડી હોવાથી સરકાર દ્વારા દર્શાવાઈ રહેલા કોરોના દર્દીઓની સંખ્યાથી વધુ દર્દીઓ હોવાનું તબીબી સૂત્રો જણાવી રહ્યાં છે.વળી નવા વેરિયન્ટમાં સપડાયેલા મોટાભાગના દર્દીઓ ઘરે આઈસોલેશનમાં રહીને જ સારવાર લઈ રહ્યા છે.
