અમદાવાદ : અમદાવાદ મેડિકલ એસોસિએશન(AMA) અને અમદાવાદ હોસ્પિટલ એન્ડ નર્સિંગ એસોસિએશન(AHNA)દ્વારા ફરી એકવાર સી ફોર્મ મુદ્દે ઉગ્ર રજૂઆત કરવામાં આવી છે.મ્યુનિસિપલ કમિશનર હાજર ન હોવાથી ઈન્ચાર્જ મ્યુનિસિપલ કમિશનર સી.આર ખરસાણને તેઓએ આવેદનપત્ર આપ્યું હતું.ડોક્ટરોએ માગ કરી હતી કે,સી ફોર્મમાં બીયુ પરમિશનનો કાયદો રદ કરવામાં આવે.આવેદનપત્ર આપી અને સ્ટેન્ડિંગ કમિટી ચેરમેન હિતેશ બારોટને મળીને પણ રજૂઆત કરી હતી.તેમને પણ ડોકટરોને આશ્વાસન આપી અને મુખ્યમંત્રીને રજૂઆત કરશે તેમ જણાવ્યું હતું
શહેરના ૪૦૦૦થી વધુ ખાનગી નર્સિંગ હોમ અને ક્લિનિકના ડોક્ટરએ ગુરુવારે બપોરે સાબરમતી રિવરફ્રન્ટ ખાતેથી રેલી સ્વરૂપે દાણાપીઠની મ્યુનિસિપલ કોર્પોરેશનની મુખ્ય ઓફિસ પહોંચ્યા હતા.કોર્પોરેશન ઓફિસમાં ડોક્ટરોએ રામધૂન બોલાવી હતી.ડોક્ટરોએ સી ફોર્મ મુદ્દે અનેક વાર રજૂઆત કરી છે,પરંતુ ત્રણ-ત્રણ વાર આવેદનપત્ર આપવા છતાં પણ માત્ર આશ્વાસન જ મળે છે.જેથી આજે ફરી એકવાર સાબરમતી રિવરફ્રન્ટથી કોર્પોરેશનની મુખ્ય કચેરી સુધી બાઇક રેલી કરી વિરોધ પ્રદર્શન કરવામાં આવ્યું હતું.આશરે 100 જેટલા ડોક્ટરો બાઇક અને ગાડી લઇને રેલી યોજી હતી.AHNAના સેક્રેટરી વિરેન શાહે જણાવ્યું હતું કે,સી ફોર્મથી અંદાજિત 400થી વધુ હોસ્પિટલ અને નર્સિંગ હોમ્સ બંધ થઇ શકે છે.અમદાવાદમાં જ માત્ર હોસ્પિટલમાં આ નિયમ લાગુ છે.બીજા શહેરોમાં આ નિયમ નથી.જેથી અહીં પણ આ નિયમ રદ કરવામાં આવે તેવી માગણી છે.જો આગામી દિવસોમાં પણ કોર્પોરેશન દ્વારા સહકાર આપવામાં નહિ આવે તો ઉગ્ર આંદોલન કરવામાં આવશે.તેમજ અચોક્કસ મુદ્દત સુધી હોસ્પિટલ બંધ કરી હડતાળ કરવાની ચીમકી પણ ઉચ્ચારવામાં આવી છે.
