અમરેલી : ગુજરાતના અમરેલી જિલ્લાના બાબરા તાલુકાના ગળકોટડી ગામમાં પુન: લગ્ન કરનારી મહિલાને તાલિબાની સજા આપવામાં આવી હોવાનો વીડિયો સામે આવ્યો છે.જેમાં પીડિત મહિલાએ પતિના અવસાન બાદ અન્ય લગ્ન કરી લેતા નારાજ થયેલા પૂર્વ પતિના પરિવારજનોએ તેને પિલર સાથે બાંધીને બેરહેમીથી ફટકારી હતી.જો કે વીડિયો ધૃણાસ્પદ તેમજ સમાજને લાંછન લગાડનારો હોવાથી દર્શાવ્યો નથી.
આ અંગે પ્રાપ્ત વિગતો મુજબ, અમરેલી જિલ્લાના બાબરા તાલુકાના ગળકોટડી ગામમાં રહેતી એક મહિલાના પતિનું 4 વર્ષ પહેલા અવસાન થયું હતું.જે બાદ મહિલાએ અન્ય પુરુષ સાથે કોર્ટ મેરેજ કર્યા હતા.ગઈકાલે મહિલા ગળકોટડી ગામે ગઈ,ત્યારે તેના પૂર્વ પતિના પરિવારજનોએ ભેગા મળી મહિલાને ઢોરમાર માર્યો હતો.આટલું જ નહીં, પીડિત મહિલાના વાળ કાપીને તેને બેરહેમીથી ફટકારવાનો વીડિયો પણ સામે આવ્યો છે.
સોશિયલ મીડિયામાં અલગ-અલગ ત્રણ જેટલા વીડિયો જેમાં પુરુષોની સાથે મહિલાઓ પણ જોવા મળી રહી છે.જે પૈકી બે મહિલાઓ પકડી રાખે છે અને એક પુરુષ પીડિતાને બેફામ માર મારતો જોઈ શકાય છે.અન્ય એક વીડિયોમાં મહિલાઓ પીડિતાના હાથની બંગડીઓ ભાંગતી નજરે પડી રહી છે.જ્યારે ત્રીજા વીડિયોમાં એક મહિલા પીડિતાના વાળ કાપી નાખતી હોવાના દ્રશ્યો જોવા મળી રહ્યાં છે.આ સમગ્ર ઘટનાનો વીડિયો સોશિયલ મીડિયામાં વાયરલ થયા બાદ પીડિત મહિલાની બહેન દ્વારા બાબરા પોલીસ સ્ટેશનમાં ફરિયાદ નોંધાવવામાં આવી છે.જેમાં ઘુઘાબેન હિકાભાઈ,ફાદુબેન વિજયભાઈ,હિકાભાઈ બાલાભાઈ અને ચકુબેન ચારોલિયા સામે ગુનો નોંધીને બે આરોપીની ધરપકડ કરવામાં આવી છે,જ્યારે અન્ય બે આરોપીની ધરપકડ માટે તપાસના ચક્રો ગતિમાન કર્યાં છે.
