ઝાપોરિઝિયા : રશિયા અને યુક્રેન વચ્ચે ૬૭ દિવસથી યુદ્ધ ચાલી રહ્યું છે ત્યારે અમેરિકાના હાઉસ સ્પીકર નેન્સી પેલોસી યુક્રેનની રાજધાની કીવ પહોંચ્યા છે.તેમણે યુક્રેનના પ્રેસિડેન્ટ ઝેલેન્સ્કીને મળી રશિયા સામે અમેરિકાના મજબૂત ટેકાની ખાતરી આપી હતી.તેમની ઓચિતી મુલાકાતથી રશિયાની ચિંતા વધી છે.દરમિયાન રશિયાના હુમલા વચ્ચે સંયુક્ત રાષ્ટ્રએ યુક્રેનના શહેર મારિયુપોલમાંથી નાગરિકોને ખસેડ્યા હતા.
બીજી બાજુ યુક્રેનના દક્ષિણના કિનારાના તેમજ પૂર્વના ઔદ્યોગિક વિસ્તારોમાં રશિયાના વ્યાપક હિતને જોતાં યુક્રેનનું લશ્કર દરેક ગામમાં લડત આપી રહ્યું છે અને વધુ નાગરિકો હવાઇ હુમલા તેમજ તોપમારાનો ભોગ બની રહ્યા છે.હજુ એક લાખ લોકો મારિયુપોલમાં હોવાનું કહેવાય છે.જેમાં ૧,૦૦૦ નાગરિકો સાથે યુક્રેનના લગભગ ૨,૦૦૦ સૈનિકો સોવિયત યુનિયન સમયના સ્ટીલ પ્લાન્ટમાં છુપાયેલા છે.શહેરનો આ એક માત્ર એવો વિસ્તાર છે જ્યાં રશિયાનો અંકુશ નથી.૨૪ ફેબ્રુઆરીએ યુક્રેન પર રશિયાના હુમલા પછી કેલિફોર્નિયાના ડેમોક્રેટિક પક્ષના નેતા પેલોસી યુક્રેનની મુલાકાત લેનારા અમેરિકાના સૌથી વરિષ્ઠ નેતા છે.
ઉલ્લેખનીય છે કે, સંયુક્ત રાષ્ટ્રના સેક્રેટરી જનરલ એન્ટોનિયો ગુટેરેસની કીવ મુલાકાત વખતે રશિયાના રોકેટ હુમલા પછી થોડા જ દિવસોમાં પેલોસીએ યુક્રેનની મુલાકાત લીધી હતી.પોલેન્ડના શહેર ઝેસઝોવમાં પેલોસીએ જણાવ્યું હતું કે, “હું અને અમેરિકન કોંગ્રેસ પ્રતિનિધીમંડળના અન્ય સભ્યો યુક્રેનની રાજધાની કીવમાં પ્રેસિડેન્ટ ઝેલેન્સ્કીને મળ્યા હતા. મુલાકાત ત્રણ કલાક ચાલી હતી.જેમાં ઝેલેન્સ્કીને તેમની નેતાગિરી માટે અમેરિકાના લોકો તરફથી પ્રશંસાનો સંદેશ અપાયો હતો.” અમેરિકન લશ્કરના એક વરિષ્ઠ અધિકારી રિપબ્લિકન જેસન ક્રોવે જણાવ્યું હતું કે, “આપણે યુક્રેન અને તેના લોકોને જે જોઇએ છે તે પૂરું પાડવું જોઇએ.આપણે છેલ્લા બે મહિનામાં તેમની લડાયકતા, દેશ માટેનું ગૌરવ, લડવાની ક્ષમતા અને સમર્થન મળે તો જીતવાની તાકાત જોયા છે.”કીવ પર કબજો કરવામાં નિષ્ફળતા પછી રશિયાના લશ્કરે દક્ષિણ અને પૂર્વ યુક્રેનના ઘણા ભાગો પર અંકુશ મેળવવા આક્રમક હુમલો કર્યો છે.રશિયા માટે યુક્રેનનું મારિયુપોલ શહેર મહત્વનું ટાર્ગેટ છે.ક્રિમીયા નજીક તેના વ્યૂહાત્મક સ્થાનને કારણે રશિયા મારિયુપોલ પર સંપૂર્ણ નિયંત્રણ મેળવવા માંગે છે.ઉલ્લેખનીય છે કે, ૨૦૧૪માં રશિયાએ ક્રિમીયા પર કબજો મેળવ્યો હતો.
