(પીટીઆઇ) વોશિંગ્ટન, તા. ૧ : અમેરિકાને નાણાકીય વર્ષ ૨૦૨૨ માટે એચ-૧બી વિઝા માટે અમેરિકન સંસદે નક્કી કરેલી ૬૫,૦૦૦ની મર્યાદા સામે પૂરતા પ્રમાણમાં અરજીઓ મળી છે તેમ ફેડરલ એજન્સીએ એક નિવેદનમાં જણાવ્યું છે.
એચ-૧બી વિઝા એક નોન ઇમિગ્રન્ટ વિઝા છે જે અમેરિકન કંપનીઓને વિશિષ્ટ કૌશલ્ય ધરાવતા વિદેશી લોકોને નોકરી પર રાખવાની પરવાનગી આપે છે.ઉલ્લેખનીય છે કે અમેરિકા સ્થિત ટેકનોલોજી કંપનીઓ મોટા પ્રમાણમાં એચ-૧બી વિઝા દ્વારા ભારતીય અને ચીનના નાગરિકોને નોકરી પર રાખે છે.
ભારતીયો સહિતના વિદેશી પ્રોફેશનલોમાં વર્ક વિઝા પછી એચ-૧બી વિઝાની સૌથી વધાર માગ છે.અમેરિકાના સંસદ દ્વારા આપવામાં આવેલી મંજૂરી અનુસાર અમેરિકા મહત્તમ રેગ્યુલર કેપ હેઠળ દર વર્ષે મહત્તમ ૬૫,૦૦૦ એચ-૧બી વિઝા જારી કરી શકે છે.આ ઉપરાંત દર વર્ષે અન્ય ૨૦,૦૦૦ એચ-૧બી વિઝા યુએસ એડવાન્સન્ડ ડિગ્રી એક્ઝેમ્પશન કેટેગરી હેઠળ આપવામાં આવે છે.
યુએસ સિટિઝનશીપ એન્ડ ઇમિગ્રેશન સર્વિસીસ(યુએસસીઆઇએસ)એ એક નિવેદનમાં જણાવ્યું છે કે જે અરજકર્તાઓને એચ-૧બી વિઝા માટેની પસંદગી થઇ નથી તેમને આ અંગેની જાણ કરી દેવામાં આવી છે.
