– વેસ્ટર્ન ડિસ્ટર્બન્સને કારણે ઉત્તર પશ્ચિમ ભારતમાં વરસાદ અને બરફ વર્ષાની હવામાન વિભાગની આગાહી
નવી દિલ્હી : અરૂણાચલ પ્રદેશના સરહદી વિસ્તારોમાં પેટ્રોલિંગ દરમિયાન સેનાના સાત જવાનો હિમસ્ખલનમાં ફસાઇને લાપતા થઇ ગયા છે.તેમના શોધવા અને બચાવવા માટે વિશેષ ટીમો બોલાવવામાં આવી છે.સેનાએ સોમવારે જણાવ્યું હતું કે આ ઘટના રાજ્યના કામેંગ સેક્ટરમાં ઉંચાઇવાળા વિસ્તારમાં રવિવારે બની હતી.જવાનો સરહદી વિસ્તારોમાં પેટ્રોલિંગ કરી રહ્યાં હતાં ત્યારે અચાનક હિમસ્ખલન થતાં તેઓ તેમાં ફસાઇ ગયા હતાં.
આ ઘટનાની જાણ થતા જ સેનાએ શોધખોળ અને બચાવ અભિયાન શરૂ કરી દીધું છે.જવાનોને શોધવાના પ્રયત્નો કરવામાં આવી રહી છે.બચાવ માટે વિશેષ પ્રકારની ટીમોને બહારથી બોલાવવામાં આવી છે.સેનાના જણાવ્યા અનુસાર છેલ્લા કેટલાક દિવસોથી આ વિસ્તારમાં હવામાન ખૂબ જ ખરાબ છે.ભારે હિમપ્રપાત થઇ રહ્યો છે.
ઉલ્લેખનીય છે કે ભારતીય સેનાની પૂર્વ કમાન આ ક્ષેત્રમાં ૧૩૪૬ કિલોમીટર લાંબી એલએસીની સુરક્ષા કરે છે.આ દરમિયાન ભારતીય હવામાન વિભાગે આગાહી કરી છે કે વેસ્ટર્ન ડિસ્ટર્બન્સને કારણે આગામી બે દિવસ ઉત્તર પશ્ચિમ ભારતમાં વરસાદ અને બરફ વર્ષા ચાલુ રહેશે.
