અલગ રીતે વિચારવાની શક્તિ કેળવતી એક મસ્ત ગેમ

તમને તોડફોડ કરવી ગમે? હાથમાં પેન કે પેન્સિલ હોય તો આડી અવળી લીટી દોરવી ગમે? હવે એ કહો કે તમે ‘આઉટ ઓફ ધ સર્કલ’ વિચારી શકો છો? આ વાક્યે અટક્યા? એક સરખી ઘરેડ કરતાં કંઈક જુદી રીતે વિચારવા માટે ‘થિંકિંગ આઉટ ઓફ ધ બોક્સ’ શબ્દપ્રયોગ તો સાંભળ્યો હતો, પણ ‘આઉટ ઓફ ધ સર્કલ’ કંઈક નવી વાત લાગી? કંઈક અલગ રીતે, હટકે વિચારવાની કે કરવાની વાત અહીંથી જ શરૂ થાય છે! હવે મુદ્દાની વાત – તમને તોડફોડ ગમતી હોય, લીટી કે ટપકાં ચીતરવાં ગમતાં હોય અને કંઈક અસામાન્ય રીતે વિચારી શકતા હો અથવા જો તમે આવી રીતે મગજને ગાડરિયા પ્રવાહ કરતાં અલગ દિશાઓમાં દોડતું કરવા માગતા હો તો તમારા સ્માર્ટફોનમાં ઉમેરો આ ગેમ (Shatterbrain – Physics Puzzles Orbital Nine Games). આ ગેમમાં તમારે જુદી રીતે વિચારવા ઉપરાંત, ફિઝિક્સના નિયમોને પણ યાદ કરવા પડશે. ગેમ રમવાની રીતે બહુ સરળ છે, ફક્ત તેમાં આગલા લેવલમાં જવા માટે દિમાગ બરાબર કસવું પડશે. શરૂઆતમાં એક નાનું ટ્યૂટોરિયલ બતાવવમાં આવશે. એ પછી, સ્ક્રીન પર જુદા જુદા આકાર આપવામાં આવશે. તમારે આંગળીના લસરકે ડોટ કે લીટી દોરવાની, શરત એટલી કે તે નીચે પડે એટલે પેલો કે પેલા બધા આકાર તૂટવા જોઈએ. જો તમે જરૂરી એવી બધી તોડફોડ કરી શકો તો બીજા લેવલમાં જઈ શકો. બની શકે શરૂઆતનાં લેવલને જ તમે કોઈ રીતે પાર કરી શકો નહીં. ત્યારે હિંટ તરીકે ‘થિંક આઉટ ઓફ ધ સર્કલ’ શબ્દો યાદ કરી, કંઈક જુદો જ આઇડિયા અજમાવી જુઓ. છતાં મેળ ન પડે તો એક જાહેરાત જોવાના બદલામાં તમને એ લેવલ પાર કરવાની હિંટ આપવામાં આવશે. શરૂઆત બે-ચાર લેવલ ભલે આ રીતે હિંટની મદદથી પાર કરી જશો, તો પછી પ્રોબ્લેમ શું છે અને એનું સોલ્યુશન કઈ રીતે આવી શકશે એ સમજાવા લાગશે. અભ્યાસમાં, કારકિર્દીમાં, ઓફિસમાં કે જીવનમાં આગળ વધવા માટે આટલું સમજવું જ જરૂરી હોય છે! એન્ડ્રોઇડ અને એપલ એપ સ્ટોર પર આ ગેમ ઉપલબ્ધ છે