અમદાવાદ : 31 ડિસેમ્બર અને નવા વર્ષની ઉજવણીમા દારૂની ડિમાન્ડ વધી જતા બે ભાઈઓએ મળીને પોતાના આંબાવાડી સ્થિત રહેણાંક ફ્લેટમાં દારૂના મેન્યુફેક્ચરિંગનું યુનિટ ચલાવતા પકડાયા હતા.શહેરના એલિસબ્રિજ પોલીસ સ્ટેશનની હદમાં પ્રિવેન્શન ઓફ ક્રાઈમબ્રાન્ચ (PCB)ની ટીમે ગુરુવારે બંને ભાઈઓને વિદેશી દારૂના જથ્થા સાથે પકડી લીધા હતા.
આરોપીઓ બ્રાન્ડેડ અને પ્રીમિયમ દારૂની બોટલો લાવીને પોતાના ઘરમાં તેમાં દેશી દારૂ ભરી દેતા હતા. PCBના અધિકારીએ કહ્યું કે,બંને આરોપીઓની ઓળખ હિતેન્દ્ર જૈન ઉર્ફે બન્ટી અને જીતેન્દ્ર જૈન ઉર્ફે ટીનો તરીકે કરવામાં આવી છે.બંને આંબાવાડીમાં શ્રેયસ ક્રોસિંગ નજીક કમલા એપાર્ટમેન્ટના ફ્લેટ નં-3ના રહેવાસી છે.બંને જણા ભંગારમાંથી દારૂની ખાલી બોટલો એકઠી કરતા હતા. આ બાદ તેઓ બોટલ પર તે જ બ્રાન્ડનું નવું સ્ટીકર લગાવીને તેમાં દારૂ ભરી દેતા પછી શહેરના ભદ્ર અને રખિયાલ વિસ્તારમાં વેચતા હતા.તેમના સેટેલાઈટ અને વસ્ત્રાપુર જેવા પોશ વિસ્તારમાં પણ ગ્રાહકો હતા.
PCB અધિકારીએ જણાવ્યું કે,તેઓ દેશી દારૂના ટેસ્ટને વધારવા માટે વિસ્કીનું એસેન્સ અને અન્ય કેટલાક કેમિકલ અંદર મિક્સ કરી દેતા હતા.જે તેનું સેવન કરનારા માટે ઘાતક સાબિત થઈ શકે છે.પોલીસે વધુમાં કહ્યું કે,આરોપીઓ નારણપુરાના વાળીનાથ ચોકમાંથી મહેશ મારવાડી અને ભેરૂજી મારવાડી પાસેથી આ એસેન્સ અને કેમિકલ ખરીદતા હતા.
પોલીસે હાલમાં તપાસ શરૂ કરી દીધી છે અને તેમના ગ્રાહકોને શોધી રહી છે,સાથે જ ડુપ્લિકેટ સ્ટ્રીકર ક્યાંથી પ્રિન્ટ કરાતા અને ક્યાંથી ખરીદાતા હતા તેની પણ તપાસ કરી રહી છે.પોલીસે 235 દારૂની બોટલો અને 60 બૂચ નંગ સાથે મળીને અંદાજિત 2 લાખની કિંમતનો મુદ્દામાલ જપ્ત કર્યો છે.પોલીસે આરોપીઓને દારૂબંધીના કેસમાં પકડ્યા છે અને તેમને કોવિડ-19ના ટેસ્ટ માટે મોકલ્યા છે.
