– પેપરલીકની ઘટનાને ટાળવા વિશેષ આયોજન કરાયું
– ૧૦૪૫૯ જગ્યા માટે ૯.૪૬ લાખ અરજી આવી હતી : અમદાવાદ સહિત સાત શહેરોમાં પરીક્ષા યોજાશે
અમદાવાદ : ગુજરાત પોલીસમાં એલઆરડીની ૧૦૪૫૯ જેટલી જગ્યા માટે રવિવારે લેખિત પરીક્ષા યોજાશે.જેમાં અમદાવાદ સહિત સાત શહેરોમા પરીક્ષા યોજાશે અને ૨.૯૪ લાખ ઉમેદવારો પરીક્ષા આપશે.ડમી પરીક્ષાર્થીઓ ન આવે અને પેપર લીક ન થાય તે માટે પરીક્ષા સ્થળે તમામ ઉમેદવારોને બાયો મેટ્રિક પધ્ધતિથી જ પ્રવેશ આપવામાં આવશે.ગુજરાત પોલીસમાં એલઆરડીની ૧૦૪૫૯ જેટલી ભરતી કરવા માટે ગત ઓક્ટોબર ૨૦૨૧માં જાહેરાત કરવામાં આવી હતી.જેમાં કુલ ૯.૪૬ લાખ જેટલી ઓનલાઇન અરજી આવી હતી.બાદમાં વિવિધ તબક્કે યોજાયેલી શારિરીક કસોટીમાં ૫.૫૯ લાખ ઉમેદવારો પૈકી ૨.૯૪ લાખ ઉમેદવારો પાસ થયા હતા.જેમાં ૮૧૩૩૦ મહિલા ઉમેદવારો હતી. આ તમામ ઉમેદવારોની લેખિત પરીક્ષા રવિવારે અમદાવાદ,સુરત,રાજકોટ,આણંદ,વડોદરા,ગાંધીનગર સહિત સાત શહેરોમાં યોજવામાં આવશે.આ અંગે વધુ માહિતી આપતા આરઆરડી ભરતી બોર્ડના અધ્યક્ષ હસમુખ પટેલે જણાવ્યું હતું કે પ્રથમવાર તમામ ઉમેદવારોને બાયોમેટ્રીક પધ્ધતિથી જ પરીક્ષા કેન્દ્રમાં પ્રવેશ આપવામા આવશે.ખાસ કરીને પેપરલીક કે અન્ય કોઇ ગેરરીતિ ન થાય તે માટે તમામ તૈયારીઓ પૂર્ણ કરવામાં આવી છે.જેમાં ઉમેદવારને પાણી પીવા માટે બહાર ન જવા દેવામાં આવે અન વર્ગખંડમાં જ પાણીની વ્યવસ્થા ગોઠવવામાં આવી છે.સાથે સાથે ઓએમઆર સીટનું સ્કેનીંગ કરીને પરીક્ષા પૂર્ણ થયાના ૨૪ કલાકમા ઓનલાઇન મુકવામાં આવશે.
