નવીદિલ્હી, તા.25 : દુનિયામાં પોતાના નાગરિકોના ગેરકાનૂની આચરણને પગલે પાકિસ્તાને દરરોજ બેઈજ્જતીનો સામનો કરવો પડી રહ્યો છે.સત્તાવાર જાણકારી અનુસાર છેલ્લા છ વફર્ષમાં 138 દેશોમાંથી કુલ 6,18,877 પાકિસ્તાની નાગરિકોને પરત મોકલી દેવામાં આવ્યા છે.સરેરાશ 300 પાકિસ્તાન નાગરિકોને પકડીને દરરોજ વિદેશથી પાકિસ્તાન મોકલવામાં આવ્યા છે.
પાકિસ્તાનની ફેડરલ ઈન્વેસ્ટીગેશન એજન્સીના જણાવ્યા મુજબ પરત મોકલાયેલા આ નાગરિકોને એ દેશમાં આવેલા પાકિસ્તાની દૂતાવાત અથવા ઉચ્ચાયોગથી યોગ્ય સહયોગ મળ્યો નહોતો જેના કારણે મોટી સંખ્યામાં પાકિસ્તાની નાગરિકોએ મુશ્કેલી સહન કરવી પડી હતી.એવા અનેક નાગરિકો હતા જેમની વિઝાની સમયમર્યાદા પૂરી થઈ ગઈ હતી અથવા તેના વર્ક પરમીટનો સમય પૂરો થઈ ગયો હતો પરંતુ તેમાં એ પાકિસ્તાની નાગરિકોની મોટી સંખ્યા છે જે ગેરકાયદેસર રીતે વિદેશ ગયા હતા જેથી તેમને પકડી લેવામાં આવ્યા હતા અને પરત વળાવી દેવાયા હતા.છેલ્લા છ વર્ષમાં પાકિસ્તાન પરત મોકલવામાં આવ્યા તેમાંથી 72 ટકાથી વધુ પાકિસ્તાનના સાત મિત્ર દેશોમાંથી જ પરત આવ્યા છે.આ મિત્ર દેશોમાં સાઉદી અરબ,ઓમાન,સંયુક્ત આરબ અમીરાત (યુએઈ),કતર,બહેરીન,ઈરાન અને તુર્કીનો સમાવેશ થાય છે.સૌથી વધુ 3,21,590 પાકિસ્તાની સાઉદી અરબથી પરત મોકલવામાં આવ્યા છે.છેલ્લા છ વર્ષમાં પ્રતિદિવસ 147 પાકિસ્તાની સાઉદી અરબથી પાકિસ્તાન આવ્યા છે.જ્યારે 53649 પાકિસ્તાનીઓને યુએઈએ પરત મોકલ્યા છે.ઈરાનની એજન્સીઓએ 1,36,930 પાકિસ્તાનીઓને પરત રવાના કર્યા છે જેમાં ગેરકાયદેસર ઘૂસણખોરોની સંખ્યા વધુ હતી.આ ગેરકાયદેસર ઘૂસણકોરોને સીમાપર લાવીને પાકિસ્તાની સુરક્ષા એજન્સીઓને સોંપી દેવામાં આવ્યા હતા.
છેલ્લા વર્ષમાં 32300થી વધુ પાકિસ્તાની તુર્કીથી મોકલવામાં આવ્યા છે.જ્યારે બ્રિટને આઠ હજારથી વધુ પાકિસ્તાનીઓને પરત મોકલ્યા છે જેમાંથી મોટાભાગના માન્ય દસ્તાવેજો વગર જ બ્રિટનમાં રહેતા હતા.જ્યારે 1700થી વધુ અમેરિકાથી પરત મોકલાયા હતા.ત્યાં પણ પકડાયેલા મોટાભાગના પાકિસ્તાની પૂરાવા વગર જ રહેતા હતા.આ ઉપરાંત રશિયાએ છ વર્ષમાં 564 પાકિસ્તાની નાગરિકોને સીમા પર સુરક્ષા અધિકારીઓના હવાલે કર્યા હતા.ભારતે આ દરમિયાન 243 પાકિસ્તાનીઓને પરત મોકલ્યા હતા.ત્યાં સુધી કે અફઘાનિસ્તાને પણ 13 પાકિસ્તાનીઓને પકડીને પરત તેના દેશ મોકલી દીધા હતા.પરત મોકલાયેલા લોકોમાં એ લોકોની ખાસ્સી સંખ્યા છે જેમને દલાલોએ નકલી દસ્તાવેજો દ્વારા વિદેશ મોકલ્યા હતા.
