આ ઉપરાંત મુખરજી અને ફોર્થ ડાઈમેન્શન સોલ્યૂશન્સ રિકોના વેન્ડર અને કસ્ટમર પણ હતા
એજન્સી > નવી દિલ્હી
સેબીએ ઈનસાઈડર ટ્રેડિંગના એક કેસમાં ફોર્થ ડાઈમેન્શન સોલ્યૂશન્સ અને તેના મેનેજિંગ ડિરેક્ટર અમલેન્દુ મુખરજીને ~2 કરોડનો દંડ ફટકાર્યો છે. ઈનસાઈડર ટ્રેડિંગ દ્વારા આ કંપની અને તેના એમડીએ ~2 કરોડનો લાભ મેળવી લીધો હતો. સેબીએ રિકો ઈન્ડિયાના સ્ટોકમાં ટ્રેડિંગની તપાસ કરી હતી અને ઓગસ્ટ 2014થી નવેમ્બર 2015 દરમિયાન આ બે એન્ટિટીએ તેમાં ટ્રેડિંગ કર્યું હતું કે કેમ તેની ખાતરી કરી હતી. તપાસમાં માલૂમ પડ્યું હતું કે મુખરજીએ રિકો ઈન્ડિયાના સીઈઓ અને સીએફઓને વ્યક્તિગત લાભ કરાવ્યો હતો અને ઈનસાઈડર્સને પ્રભાવિત કર્યા હતા અને તેમની પાસેથી સંવેદનશીલ માહિતી મેળવી લીધી હતી કે રિકો ઈન્ડિયાના ફાઈનાન્શિયલ સ્ટેટમેન્ટ સાચા નથી.
આ ઉપરાંત મુખરજી અને ફોર્થ ડાઈમેન્શન સોલ્યૂશન્સ રિકોના વેન્ડર અને કસ્ટમર પણ હતા. તેમણે આ માહિતી મેળવીને રિકોના સ્ટોકમાં ટ્રેડિંગ કર્યું હતું. સેબીએ નોંધ્યું હતું કે ફોર્થ ડાઈમેન્શને ટ્રેડિંગ કરીને ~1.13 કરોડનો નફો કરી લીધો હતો અને નવેમ્બર 2015માં જ્યારે ઓડિટરે રિકો અને તેના કસ્ટમર્સ વચ્ચે શંકાસ્પદ ટ્રાન્ઝેક્શનની સોય તાકી ત્યારે તેનું સંપૂર્ણ હોલ્ડિંગ વેચી દીધું હતું. કંપનીના ફાઈનાન્શિયલ સ્ટેટમેન્ટ્સ સાચા નથી તેવી સત્તાવાર જાહેરાત એપ્રિલ 2016માં કરવામાં આવી હતી. ફોર્થ ડાઈમેન્શને સંપૂર્ણ શેરહોલ્ડિંગ વેચી દઈને તેને થનારા ~1.17 કરોડના નુકસાનથી બચી ગઈ હતી. સેબીએ આ અંગે મંગળવારે સાંજે ચુકાદો આપ્યો હતો.
તેણે કહ્યું હતું કે ફોર્થ ડાઈમેન્શને ગેરકાયદેસર રીતે કુલ ~2.3 કરોડનો નફો કરી લીધો હતો.
