- શ્રીલંકાના જાફના ખાતે થાઈ પોંગલના પ્રસંગે પતંગબાજીની પ્રતિયોગિતાનું આયોજન કરવામાં આવે છે અને તે દરમિયાન મોટા મોટા પતંગો ઉડાડવામાં આવે છે
નવી દિલ્હી, તા. 23 ડિસેમ્બર,ગુરૂવાર : શ્રીલંકાના જાફના ખાતેથી એક ખૂબ જ ચોંકાવનારો વીડિયો સામે આવ્યો છે જેમાં એક વ્યક્તિ પતંગ ચગાવતા-ચગાવતા અચાનકથી આકાશમાં પહોંચી ગઈ હતી.ત્યાર બાદ ઘણાં લાંબા સમય સુધી તે દોરડાની મદદથી હવામાં જ ઝૂલતો રહ્યો હતો.
આ ઘટના બની તે સમયે ત્યાં પતંગબાજીની પ્રતિયોગિતા ચાલી રહી હતી અને આવી દુર્ઘટના બની હતી.એક શખ્સ પોતાની ટીમના બાકીના સદસ્યો સાથે મળીને એક વિશાળ પતંગની દોરડી પકડીને ઉછાળવાનો પ્રયત્ન કરી રહ્યો હતો તે સમયે અચાનક જ તે હવામાં 40 ફૂટ ઉપર પહોંચી ગયો હતો.
તે શખ્સને હવામાં ઝૂલતો જોઈને તેના તમામ સાથીદારો ચોંકી ઉઠ્યા હતા.હકીકતે તે પતંગ એટલો ભારે હતો કે, હવા સાથે તે વ્યક્તિને પણ પોતાની સાથે ઉડાડી ગઈ હતી.તે વ્યક્તિ ઘણાં લાંબા સમય સુધી હવામાં લટકી રહ્યો હતો.આ દરમિયાન તેના સાથીદારો તેને દોરડું છોડી દેવા માટે કહેવા લાગ્યા હતા જેથી તે વધુ ઉપર ન પહોંચી જાય.બાદમાં પતંગ થોડો નીચે આવ્યો એટલે તે વ્યક્તિએ દોરડું છોડી દીધું હતું અને તે જમીન પર પટકાયો હતો.
