ઉતરાયણના પર્વને હજી 25 દિવસ જેટલો સમય બાકી છે જો કે તે પહેલા જ ધારદાર દોરીથી અકસ્માતના બનાવો સામે આવવા લાગ્યા છે.સુરતમાં પતંગના દોરાને કારણે એક થોડા દિવસ અગાઉ એડવોકેટનું ગળુ કપાયું હતું જેમને સમયસર સારવાર મળતા તેમનો જીવ બચ્યો હતો.ત્યારે ફરીવાર પાંડેસરા વિસ્તારમાં પતંગના દોરાથી પરિવાર સાથે બાઈક પર જતા યુવકનું ગળું કપાયું છે.આ ઘટનામાં યુવકની પત્નીને પણ ઈજા પહોંચવા પામી છે.
ગતરોજ સુરતના પાંડેસરા વિસ્તારમાં રહેતો બબલુ નામનો વ્યક્તિ તેમના પત્ની અને બે પુત્રી સાથે પિયુષ પોઇન્ટ પાસેથી બાઈક પર પસાર થઈ રહ્યા હતા.તે દરમિયાન અચાનક બબલુના ગળાના ભાગે પતંગનો દોરો આવ્યો હતો.અને તેને કારણે બબલુના ગળા પર ગંભીર ઈજા પહોંચી હતી.તો બીજી તરફ પતંગ ના દોરાથી પતિને બચાવવા જતા તેની પત્નીને પણ હાથમાં દોરો ઘસાતા ઈજા થઈ હતી.જોકે આ ઘટના બાદ પણ સાવચેતીપૂર્વક યુવકે બાઇક સાઈડ કરી દેતા તેમની પુત્રીઓને કોઈ ઈજા પહોંચી ન હતી.ઘટનાને પગલે તાત્કાલિક આ અંગે 108 ને જાણ કરાતા એમ્બ્યુલન્સ મારફતે બબલુ ને ગંભીર હાલતમાં સિવિલ હોસ્પિટલમાં લઈ જવામાં આવ્યો હતો જ્યાં તેની સારવાર ચાલી રહી છે.
ઉલ્લેખનીય છે કે ઉતરાયણનો પર્વ નજીક આવી રહ્યો છે.પરંતુ તે પહેલાજ સુરતમાં પતંગ રસીયાઓએ રજાના દિવસો અથવા તો સાંજના સમયે પતંગ ચગાવવાનું શરૂ કરી દીધું છે.ત્યારે પતંગના દોરાને કારણે અનેક વખત અકસ્માતો સર્જાતા રહે છે તો કેટલાક કિસ્સાઓમાં લોકોના જીવ જવાના બનાવો પણ સામે આવ્યા છે.ત્યારે હાલમાં ઉતરાણ પહેલા જ પતંગના દોરાને કારણે અત્યાર સુધીમાં બે લોકોના ગળા કપાયા છે.ત્યારે તહેવાર પહેલાજ સુરતમાં પતંગના દોરાને કારણે અકસ્માતની ઘટના બનતા ધારદાર દોરાનો ઉપયોગ ન કરવા અને સાવચેતી પૂર્વક વાહન ચલાવવા માટે સુરત પોલીસ અને તબીબો દ્વારા પણ લોકોને અપીલ કરવામાં આવતી હોઈ છે.
