ચીન સાથે વેપાર નહીં કરીને કોરોના પર કાબૂ મેળવી લીધો હોવાનો ઉત્તર કોરિયાનો દાવો
એજન્સી, પ્યોંગયાંગ
સમગ્ર દુનિયા કોરોના વાયરસની મહામારીનો સામનો કરી રહી છે. ઉત્તર કોરિયાના સરમુખત્યાર કિમ જોંગ ઉને દાવો કર્યો છે કે, તેમના દેશમાં કોરોના વાયરસનો હવે એક પણ કેસ સામે આવ્યો નથી. કોમ્યુનિસ્ટ દેશે દાવો કર્યો છે કે તેમણે કોરોના વાયરસ પર કાબૂ મેળવી લીધો છે. ઉત્તર કોરિયાના આ દાવાથી સમગ્ર દુનિયાને આશ્ચર્ય થઈ રહ્યું છે.
કિમ જોંગ ઉને પોતાની પ્રશંસા કરતા જણાવ્યું હતું કે, તેમના દેશમાંથી કોરોનાનો ખાત્મો થઈ ગયો છે જ્યારે પાડોશી દેશ ચીનમાં વૈશ્વિક માહામારીથી અત્યાર સુધી 3200થી વધુ લોકોના મોત થયા છે.
ઉને વધુમાં જણાવ્યું હતું કે, 30 દિવસ સુધી તમામને ક્વોરન્ટાઈન, સરહદ બંધ કરીને અને ચીનની સાથે વેપાર નહીં કરીને તેમણે આ માહમારી પર કાબૂ મેળવી લીધો છે.
જોકે નિષ્ણાંતોએ જણાવ્યું છે કે, ઉત્તર કોરિયા કોરોના સંકટને છૂપાવવાના પ્રયાસ કરી રહ્યું છે. સીઆઈએના ઉત્તર કોરિયાના નિષ્ણાંત રહી ચૂકેલા જુંગ એચ પાકે જણાવ્યું છે કે, ઉત્તર કોરિયામાં કોરોનાનો એકપણ કેસ ના હોય એ અસંભવ છે. ઉત્તર કોરિયા અર્થવ્યવસ્થા, માનાવાધિકાર ઉલ્લંઘનના મુદ્દા પરથી લોકોનું ધ્યાન હટાવવા માટે કિમ જોંગ ઉન આવા પ્રકારના દાવા કરી રહ્યા છે.
