– શિવસેના-પ્રમુખ હવે એકલા પડી ગયા છે એવો સવાલ પત્રકારોએ રાજ ઠાકરેનાં પત્નીને પૂછતાં તેમણે આપ્યો આવો જવાબ
એકનાથ શિંદેના બળવા પછી શિવસેના સાચે જ મુશ્કેલીમાં છે.આ પૃષ્ઠભૂમિમાં રાજ ઠાકરેનાં પત્ની શર્મિલા ઠાકરેએ પુણેમાં સાડીની એક દુકાનના ઉદ્ઘાટનમાં હાજરી આપ્યા બાદ પત્રકારો સાથેની વાતચીતમાં નિવેદનો આપ્યાં હતાં.પત્રકારોએ ઠાકરેભાઈઓ એક થશે કે કેમ એવો પ્રશ્ન પૂછતાં તેમણે પત્રકારોને વળતો પ્રશ્ન કરીને મૂંઝવી દીધા હતા તથા જેમ તેમના માનવાથી કોઈ ફરક નથી પડતો તેમ જ અમારા માનવાથી પણ કોઈ ફરક નથી પડતો એમ જણાવ્યું હતું.ત્યાર બાદ એક પત્રકારે કહ્યું કે ઉદ્ધવ ઠાકરે અત્યારે એકલા પડી ગયા છે.આ સાંભળીને શર્મિલા ઠાકરએ કહ્યું કે તેમને આવવા દો, જો તેઓ અમને બોલાવશે તો વિચારીશું.
ટૂંક સમયમાં કૅબિનેટનું વિસ્તરણ થશે એવી માહિતી મળી હોવાનું જણાવીને તેમણે કૅબિનેટમાં મહિલાઓને અવશ્ય સ્થાન મળશે એવી આશા વ્યક્ત કરી હતી.રાજ્યના રસ્તાઓ પર ખાડાઓના સામ્રાજ્ય વિશે તેમણે કહ્યું હતું કે મારા પતિ સત્તા પર આવશે ત્યારે રસ્તા પરના ખાડા ચોક્કસ દૂર થશે.
