બારડોલી : મઢી શુગરના મેનેજિંગ ડિરેક્ટરના રાજીનામાંની માંગ સાથે સાત ડિરેક્ટરોએ પ્રમુખને લેખિતમાં રજૂઆત કરતાં સહકારી ક્ષેત્રમાં ખળભળાટ વ્યાપી ગયો છે.એમડી દ્વારા સંસ્થાને મોટા પાયે આર્થિક નુકસાન પહોંચાડવામાં આવ્યું હોવાના આરોપ મૂકવામાં આવ્યો છે.
આ અંગે મળતી માહિતી અનુસાર છેલ્લા ઘણા સમયથી મઢી સુગર ફેક્ટરીના એમડી રમેશ વર્મા વિવાદોમાં રહ્યા છે.સંસ્થાના ઉપપ્રમુખ કેતન પટેલ સહિત 7 ડિરેક્ટરોએ પ્રમુખને કરેલી રજૂઆતમાં જણાવાયું છે કે એમડી રમેશ વર્મા દ્વારા સંસ્થાને આર્થિક નુકસાન કરવામાં આવ્યું છે.આ અંગે અનેક વખત રજૂઆત છતાં સંસ્થા દ્વારા કોઈ પગલાં લેવામાં આવ્યા નથી કે ઠપકાની નોટિસ પણ ફટકારવામાં આવી નથી.આથી રોષે ભરાયેલા ડિરેક્ટરોએ સામાન્ય સભાની મિટિંગમાં ચર્ચા કરી સંસ્થાને જે કઈ નુકશાન કર્યું છે તેની રિકવરી લઈ રાજીનામું લઈ ફરજ પરથી છૂટા કરવાની માંગ કરી છે. જેને લઈ સમગ્ર સહકારી ક્ષેત્રમાં ખળભળાટ મચી ગયો છે.
