બારડોલી,
સુરત જિલ્લાના ઉમરપાડા તાલુકાનાં નસારપૂર ગામેથી સુરત રેન્જ આઇજીની ઓપરેશન ગ્રૂપની ટીમે બાતમીના આધારે વિદેશી દારૂના જથ્થા સાથે એક શખ્સને ઝડપી પાડ્યો હતો જ્યારે આ વિદેશી દારૂનો જથ્થો પૂરો પાડનાર બે શખ્સને વોંટેડ જાહેર કર્યા હતા.
આ અંગે મળતી માહિતી અનુસાર સુરત રેન્જ આઇજીની ઓપરેશન ગૃપની ટીમના પોલીસ સ્ટાફના માણસો ઉમરપાડા વિસ્તારમાં પેટ્રોલીંગમાં હતા તે દરમ્યાન તેઓએ બાતમીના આધારે નસારપૂર ગામે સ્ટેશન ફળિયામાં રહેતા ભુપેન્દ્ર ઉર્ફે ભૂપો ગંભીરભાઈ વસાવા નાઓને ત્યાં રેડ કરતાં ઘરની પાછળ વાડાના ભાગે સંતાડેલ વિદેશી દારૂની કુલ 456 નંગ બોટલ જેની કિંમત રૂ. 84,000નો જથ્થો મળી આવ્યો હતો.પોલીસે આ દારૂના જથ્થા સાથે ભુપેન્દ્ર ઉર્ફે ભૂપાને ઝડપી પાડ્યો હતો.તેની પૂછતાછ કરતાં આ વિદેશી દારૂનો જથ્થો અશોક મારવાડી (રહે, કંબોડિયા, તા-નેત્રંગ, જી-ભરુચ) નાઓએ તેના માણસ રાહુલ સાથે પૂરો પાડ્યો હતો જેથી પોલીસે આ બંને શખ્સોને વોંટેડ જાહેર કરી આગળની કાર્યવાહી હાથ ધરી છે.
