સુરત : ડુમ્મસ રોડના લક્ઝુરીયા બિઝનેશ હબમાં એક્સએલ ઇન્ટરનેશનલના ભાગીદારો દ્વારા દુબઇ અને યુક્રેનના સ્ટુડન્ટ વિઝા અપાવવાની લાલચ આપી રૂ.26.41 લાખ પડાવનાર ત્રણ પૈકીના એક ભાગીદારે અડાજણમાં ગ્લોબલ વિઝા કન્સ્લટન્સીના નામે ઓફિસ શરૂ કરી પિત્રાઇ ભાઇ-બહેન સહિત ત્રણને કેનેડાના વિઝાના નામે રૂ.13.40 લાખ પડાવ્યાની ફરિયાદ અડાજણ પોલીસમાં નોંધાય છે.ડુમ્મસ રોડ પર લક્ઝુરીયા બિઝનેશ હબમાં એક્સએલ ઇન્ટરનેશનલના ભાગીદાર રાજેન્દ્ર રવજી તળસરીયા(રહે.એ 904,સર્જન પેલેસ,ભરીમાતા રોડ,સિંગણપોર),હેમલ હિપેશ પાંડવ(ઉ.વ.117,118, માધવાનંદ સોસાયટી, ધનમોરા સર્કલની બાજુમાં,કતારગામ)અને ધાર્મિક માધવાણીએ હજીરાની ઓએનજીસી કંપનીના કોન્ટ્રાક્ટ હેઠળના કર્મચારી મુકેશ દલપત પરમાર સહિત પાંચ જણાને દુબઇ અને યુક્રેનના સ્ટુડન્ટ વિઝાના નામે રૂ. 26.41 લાખ પડાવી લીધાની ફરિયાદ બે દિવસ અગાઉ ઉમરા પોલીસમાં નોંધાય હતી.
જે પૈકી રાજેન્દ્ર અને હેમલની ધરપકડ કરી પૂછપરછ કરવામાં આવી રહી છે.જયારે આજ રોજ રાજેન્દ્ર વિરૂધ્ધ વધુ એક ફરિયાદ નોંધાય છે.રાજેન્દ્રએ અડાજણના સ્ટાર બજારની સામે રોયલ ટ્રેડ સેન્ટરમાં ગ્લોબલ વિઝા કન્સ્લટન્સીના નામે ઓફિસ શરૂ કરી વર્ષ 2018 થી આજ દિન સુધીમાં રોહિત હસમુખ ચણગાવાલા(રહે.શીવદર્શન સોસાયટી,ડીંડોલી),તેની પિત્રાઇ બહેન અર્પીતા અરવિંદ પેટીવાલા અને બનેવી ચિંતન રમેશ પટેલને કેનેડાની વર્ક પરમીટ અપાવવાની લાલચ આપી કુલ રૂ. 13.40 લાખ પડાવી લીધા હતા.વર્ક પરમીટ નહીં મળતા રૂપિયાની પરત માંગણી કરનાર રોહિતને રાજેન્દ્રએ હવે મારા ઘરે ઉઘરાણીએ આવશો તો પાછા સલામત તમારા ઘરે જઇ શકશો નહીં તેવી ધમકી પણ આપી હતી.
