અમદાવાદ : અમદાવાદ ઈન્ટરનેશનલ એરપોર્ટ ઉપર કસ્ટમ ઓફિસર તરીકે ખોટી ઓળખ આપીને પેસેન્જરનું ગોલ્ડ બિસ્કિટ સહિત કુલ 5.92 લાખની લૂંટકેસમાં તબક્કાવાર કુલ 6 આરોપીઓની ધરપકડ થઈ ચૂકી છે.તો બીજીબાજુ ઘટનાને અઠવાડિયું વીતી ગયા બાદ પણ ફરિયાદી વિદેશથી લાવેલા ગોલ્ડ બિસ્કિટના બિલ અને આરોપીઓને ફરિયાદીની માહિતી ક્યાંથી મળતી હતી તેવા ઘણાં મહત્વનાં પ્રશ્નો હજુપણ વણઉકેલ્યાં છે,અલબત્ત આ બંને મુદ્દે એરપોર્ટ પોલીસ હજુ તપાસનો વિષય હોવાનું રટણ કરી રહી છે.
મૂળ ઉત્તરપ્રદેશના વતની અને અઢી વર્ષથી સાઉદી રિયાધમાં નોકરી કરતા મોહંમદ ફેઝલ અને તેના મિત્રને અમદાવાદ ઈન્ટરનેશનલ એરપોર્ટ ઉપર કેટલાક લોકોએ કસ્ટમ ઓફિસર તરીકેની ખોટી ઓળખ આપી ગોલ્ડ બિસ્કિટ,મોબાઈલ ફોન અને રોકડ રકમ મળીને રૂ 5.92 લાખની લૂંટ ચલાવી હતી. આ કેસમાં ફરિયાદ બાદ એરપોર્ટ પોલીસે એરપોર્ટ ઉપર જ પાર્કિંગની કામગીરી કરતી નમસ્તે-જી કંપનીના પાંચ કર્મચારીઓ સહિત એક અન્ય શખ્સ શશીકાંત તિવારી સહિત કુલ છ લોકોની ધરપકડ કરી છે.
આ સાથે ગોલ્ડ બિસ્કિટ સહિત લૂંટનો મુદ્દામાલ રિકવર કર્યો છે.તદુપરાંત એરપોર્ટ પાર્કિંગનું કામનું કરતી નમસ્તે-જી એજન્સીના પકડાયેલા પાંચ કર્મચારીઓની પૂછપરછમાં જાણવા મળ્યું કે તેમને કયા પેસેન્જરને ટાર્ગેટ કરવાનો છે તે અંગેની માહિતી શશીકાંત તિવારી નામનો શખ્સ આપતો હતો.આ તબક્કે ફરિયાદી ફેઝલની માહિતી શશીકાંત તિવારીને કોણે આપી તે પ્રશ્ન હજીપણ વણઉકેલ્યો છે.તદુપરાંત એરપોર્ટ પોલીસ સ્ટેશનમાં થયેલી ફરિયાદ મુજબ ફરિયાદી ફેઝલના અન્ડર ગારમેન્ટમાંથી આરોપીઓએ ગોલ્ડ બિસ્કિટ શોધી કાઢી લૂંટી લીધું હતું.જેથી ફરિયાદ બાદ એરપોર્ટ પોલીસે ફેઝલને સોનાનાં 100 ગ્રામના બિસ્કિટનું બિલ રજૂ કરવા કહ્યું હતું.
