– રાજકીય આંટીઘૂંટીને લઈ પલસાણા પીએસઆઇનો ભોગ લેવાયો હોવાની ચર્ચા
પલસાણા : પલસાણા પોલીસ સ્ટેશનની હદમાં બલેશ્વર ગામની સીમમાંથી પામ ઓઇલ તેમજ સ્ટીલ ચોરી પ્રકરણમાં પલસાણા પીએસઆઇ સી.એમ.ગઢવીને સસ્પેન્ડ કર્યા બાદ પોલીસ બેડામાં ભારે ચકચાર મચી ગઈ છે.સી.એમ. ગઢવી સામેની કાર્યવાહીને લઈ પણ પોલીસ બેડામાં અનેક તર્ક-વિતર્ક સર્જાયા છે.
ગત બુધવારના રોજ સુરત જિલ્લા લોકલ ક્રાઇમ બ્રાન્ચની ટીમે પલસાણાના બલેશ્વર ખાતે આવેલા જૈન મંદિરની બાજુમાંથી હાઇવે પરથી પસાર થતી ટ્રક અને ટેન્કરના ડ્રાઇવર સાથે મળી પામ ઓઇલ તેમજ સ્ટીલના સળિયા ચોરી લેતા હોવાનું નેટવર્ક ઝપડી પાડી 81 લાખથી વધુનો મુદ્દામાલ કબ્જે કર્યો હતો.આટલા મોટા પ્રમાણમાં હાઇવે પર ચોરીનું નેટવર્ક ચાલતું હોય જિલ્લા પોલીસ વડાએ સ્થાનિક પોલીસની નિષ્કાળજી ગણી પલસાણા પીએસઆઇ સી.એમ.ગઢવીને સસ્પેન્ડ કર્યા હતા.જો કે એક ચર્ચા મુજબ છેલ્લા ઘણા લાંબા સમયથી જિલ્લામાં અધિકારીઓનો રાફડો છે અને અલગ પોલીસ સ્ટેશનની ખુરશી પર બેસવા માટે ધમપછાડા ચાલી રહ્યા છે.જેથી કોઈ રાજકીય આંટીઘૂંટીને લઈ પલસાણા પીએસઆઇનો ભોગ લેવાયો હોય તેવી શક્યતા નકારી શકાય એમ નથી.છેલ્લા ઘણા લાંબા સમયથી પલસાણા પોલીસ સ્ટેશનને સી.એમ. ગઢવી ચલાવી રહ્યા હતા.જેથી આ ખુરશી ઉપર અનેક અધિકારીઓની પણ નજર હતી.તે વાત પણ હકીકત છે.બીજી તરફ પલસાણા પોલીસ મથકનો ચાર્જ પેરોલ ફર્લો પી.આઈ. એ.ડી. ચાવડાને સોંપવામાં આવ્યો છે.
