નવી દિલ્હી, તા. 02 મે 2023, મંગળવાર : દેશમાં ઈલેક્ટ્રિક મોબિલિટીનો ટ્રેન્ડ સતત વધી રહ્યો છે.કેન્દ્ર સરકાર પણ ઈવીને વેગ આપવા અનેક પ્રોત્સાહનો અને નિયમોમાં સરળીકરણ કર્યું છે.જો કે, ઈલેક્ટ્રિક વ્હિકલ બનાવતી કંપનીઓ આ નિયમોનો ગેરલાભ ઉઠાવી રહી હોવાનું જાણવા મળતાં ભારે ઉદ્યોગના મંત્રાલયે કડક પગલાં લીધા છે.હેવી ઈન્ડસ્ટ્રીઝ મંત્રાલયે હાલમાં જ ખોટી રીતે સબસિડી મેળવતી ઓકિનાવા અને હીરો ઈલેક્ટ્રિક પાસેથી રૂ. 250 કરોડની વસૂલાત કરવા આદેશ કર્યો છે.
ઓલા અને એથર એનર્જી જેવી ઈલેક્ટ્રિક સ્કૂટી ઉત્પાદકો પણ ગ્રાહકો પાસેથી ચાર્જર માટે વધારાના રૂ.420 કરોડ વસૂલ્યા હતા.જેની વિરૂદ્ધ સરકારે પગલું લેતાં પૈસા પાછા આપવા સહમત થઈ હતી.હીરો ઇલેક્ટ્રિક અને ઓકિનાવા કેન્દ્ર સરકારના નિયમોનું ઉલ્લંઘન કરીને ઇલેક્ટ્રિક સ્કૂટી બનાવી રહી છે અને સબસિડી મેળવી રહી છે.એક સરકારી અધિકારીએ જણાવ્યું હતું કે ઈલેક્ટ્રિક સ્કૂટી બનાવતી બંને કંપનીઓ ઈલેક્ટ્રિક સ્કૂટીમાં આયાતી ઘટકોનો વ્યાપકપણે ઉપયોગ કરે છે.જો કે, કેન્દ્ર સરકારની સબસિડી મેળવવા માટે સ્થાનિક પાર્ટ્સનો ઉપયોગ કરવો જરૂરી છે.આ નિયમના ઉલ્લંઘનને કારણે ઓકિનાવા ઓટોટેક પાસેથી રૂ.116 કરોડ જ્યારે હીરો ઇલેક્ટ્રિક પાસેથી રૂ.133 કરોડ વસૂલશે.હેવી ઈન્ડસ્ટ્રીઝ મંત્રાલયનું આ પગલું ARAI અને ICAT જેવી ટેસ્ટિંગ એજન્સીઓના અંતિમ રિપોર્ટ મળ્યા બાદ લેવામાં આવ્યું છે.નાણાકીય વર્ષ 2019-20થી ઓકિનાવા અને હીરો ઇલેક્ટ્રિક જેવી કંપનીઓને ભારે ઉદ્યોગ મંત્રાલય દ્વારા સબસિડી આપવામાં આવી રહી છે.
સબસિડીનો દુરૂપયોગ
ભારે ઉદ્યોગ મંત્રાલયની ફાસ્ટર એડોપ્શન એન્ડ મેન્યુફેક્ચરિંગ ઓફ ઈલેક્ટ્રિક વ્હીકલ અથવા ફેમ સ્કીમ હેઠળ,ઇલેક્ટ્રિક સ્કૂટી બનાવતી કંપનીઓને સબસિડી આપવામાં આવી રહી હતી.ભારે ઉદ્યોગ મંત્રાલયે ઇલેક્ટ્રિક સ્કૂટી ઉત્પાદકો હીરો ઇલેક્ટ્રિક અને ઓકિનાવા પાસેથી ₹250 કરોડની વસૂલાત માટે નોટિસ જારી કરી છે.સૂત્રોએ જણાવ્યું છે કે ભારે ઉદ્યોગ મંત્રાલયે 29 એપ્રિલ 2023ના રોજ બંને કંપનીઓને નોટિસ પાઠવીને કેન્દ્ર સરકારની સબસિડી ખોટી રીતે મેળવી હોવાનો આરોપ મૂક્યો હતો.
આ કંપનીઓ પણ તપાસ હેઠળ
ટેસ્ટિંગ એજન્સીને જાણવા મળ્યું હતું કે ઇલેક્ટ્રિક સ્કૂટી બનાવતી બંને કંપનીઓ આયાતી પાર્ટ્સનો વધુ પડતો ઉપયોગ કરી રહી છે.ભારતમાં ઇલેક્ટ્રિક વાહનોનું ઉત્પાદન કરતી 13 કંપનીઓ આ તપાસમાં સામેલ છે.હીરો ઈલેક્ટ્રિક અને ઓકિનાવા ઉપરાંત ઓકાયા,જિતેન્દ્ર ન્યૂ ઈવી,ગ્રીવ્સ ઈલેક્ટ્રિક મોબિલિટી,રિવોલ્ટ ઈન્ટેલિકોર્પ,કાઈનેટિક ગ્રીન એનર્જી,લોહિયા,ઠુકરાલ ઈલેક્ટ્રિક અને વિક્ટરી ઈલેક્ટ્રિકની તપાસ કરવામાં આવી રહી છે.
