અમદાવાદ,શુક્રવાર : પૂર્વ વિસ્તારમાં રિંગ રોડ ઉપર વાહન અકસ્માતમાં બે યુવકોના મોત થયા હતા.જોમાં ઓઢવમાં મોપેડ સ્લીપ થતાં યુવકનું સારવાર દરમિયાન ચાર દિવસે મોત થયું હતું.જ્યારે વસ્ત્રાલ ચાર રસ્તા પાસે હિટ એન્ડ રનની ઘટના બની હતી જેમાં મોપેડને ટકકર મારી યુવકને મોતને ઘાટ ઉતારી ટ્રક લઇને ડ્રાઇવર ભાગી ગયો હતો.
આ કેસની વિગત એવી છે કે ઓઢવમાં રાજેન્દ્ર પાર્ક રોડ ઉપર મુકેશનગર પાસે ઉમિયાનગરમાં રહેતા સૌરભભાઇ સુરેશભાઇ કડીયા (ઉ.વ.૨૨)તા.૧ના રોજ મોપેડ લઇને ઓઢવ રાજેન્દ્ર પાર્ક ચાર રસ્તાથી પાણીની કેનાલ તરફ જતા હતા આ સયમે રોડ ઉપર તેમનું મોપેડ સ્લીપ થતાં સારવાર માટે સિવિલમાં દાખલ કરવામાં આવ્યા હતા.જ્યાં ચાર દિવસની સારવાર દરમિયાન ગઇકાલે સાંજે મોત નીપજ્યું હતું, આ બનાવ અંગે ટ્રાફિક આઇ ડિવિઝન પોલીસે ગુનો નોંધી વધુ તપાસ હાથ ધરી છે.
બીજા બનાવમાં નિકોલ નારાયણ રેસિડેન્સીમાં રહેેતા અને ઓઢવ સિંગરવામાં મશીનરીનો વ્યવસાય કરતા રવિભાઇ હરજીભાઇ સભાણી (ઉ.વ.૨૯) ગઇકાલે સવારે રિંગ રોડ ઉપરથી મોપેડ લઇને જતા હતા જ્યાં એસ.પી.રિંગ રોડ ઉપર પાંજરાપોળથી વસ્ત્રાલ ચાર રસ્તા તરફ જવાના રોડ ઉપર પૂર ઝડપે આવી રહેલી ટ્રકના ડ્રાઇવરે તેમના મોપેડને ટકકર મારતાં સ્થળ પર મોત થયું હતું.આ બનાવ અંગે ટ્રાફિક આઇ ડિવિઝન પોલીસે ગુનો નોંધી સીસીટીવી ફૂટેજ આધારે ફરાર ટ્રક ચાલકની શોધખોળ કરવાની કાર્યવાહી હાથ ધરી છે
