લંડન : ઓપેક અને તેના સાથી દેશોની કાર્ટેલે ક્રૂડ ઓઈલમાં સારી એવી કમાણી કરી લીધા પછી હવે ક્રૂડ ઓઈલનું ઉત્પાદન વધારવાનો નિર્ણય કર્યો છે.આ કાર્ટેલમાં રશિયાનો પણ સમાવેશ છે જેણે યુદ્ધ કરીને ક્રૂડ ઓઈલના ભાવ ભડકાવ્યા છે.આ દેશોએ જુલાઈથી રોજનું 6,48,000 બેરલ ક્રૂડ ઓઈલ ઉત્પાદન કરવાનો નિર્ણય લીધો છે.તેનાથી ક્રૂડ ઓઈલના ભાવ નીચા આવશે તેવી આશા છે જેને કારણે ભારત સહિતના દેશોને રાહત થઈ શકે છે.ઓપેક પ્લસ દેશોની ગુરુવારે મીટિંગ યોજાઈ હતી જેમાં ઉત્પાદન વધારવાનો નિર્ણય લેવાયો હતો.કોરોનાકાળમાં ઓઈલનો વપરાશ ઘટી જતા આ દેશોએ ભાવમાં ઘટાડો અટકાવવા માટે ઉત્પાદન પર કાપ મૂકી દીધો હતો.આ દેશો તબક્કાવાર રીતે ઉત્પાદન વધારતા હતા.હાલમાં તેઓ રોજનું 4,32,000 બેરલ ઉત્પાદન કરી રહ્યા છે.
આ દેશોએ હવે ઉત્પાદન વધારવાનો નિર્ણય એટલા માટે લીધો છે કારણ કે અમેરિકા અને યુરોપ સહિતના વિશ્વના દેશોમાં ઓઈલ પ્રોડક્ટ્સ અને ગેસના ભાવ ખાસ્સા વધી ગયા છે.તેને કારણે હવે ઓઈલના વપરાશ પર અસર થવાની ભીતિ સેવાઈ રહી છે.એટલું જ નહીં,ભાવ આટલા ઊંચા રહેશે તો વૈશ્વિક ગ્રોથને પણ અસર થઈ શકે છે અને તેવા સંજોગોમાં ઓઈલ ઉત્પાદન કરી રહેલા દેશોને પણ અસર થઈ શકે છે.આમ પણ આ દેશોએ છેલ્લાં એક વર્ષમાં અને ખાસ કરીને છેલ્લાં છ મહિનામાં જંગી કમાણી કરી લીધી છે.અમેરિકાએ ઓપેક પ્લસ દેશોને અપીલ કરી હતી કે રશિયા પર મુકાયેલા પ્રતિબંધને કારણે જે ક્રૂડની ઘટ પડે તેટલું ઉત્પાદન વધારી દો.પરંતુ આ દેશોના અઘોષિત લીડર સાઉદી અરેબિયાએ તેનો ઈનકાર કરી દીધો હતો.અમેરિકામાં આ વર્ષે ક્રૂડ ઓઈલના ભાવ 54 ટકા ઉછળી ગયા છે.ગેસના ભાવ ગેલનદીઠ 4.71 ડોલર પર પહોંચી ગયા છે.
