અલ કાયદાના ચીફ અને વોન્ટેડ આતંકી ઓસામા બિન લાદેનને તેના ઘરમાં ઘુસીને મારનાર અમેરિકન નેવી સીલ કમાન્ડો પૈકીના એક રોબર્ટ ઓ નીલની ધરપકડ કરવામાં આવી છે.આ કમાન્ડો પર જાહેરમાં નશામાં ધૂત બનીને ફરવાનો તેમજ બીજાને ઈજા પહોંચાડવાનો આરોપ મુકવામાં આવ્યો છે.તેની ટેક્સાસમાં ધરપકડ કરવામાં આવી છે.જોકે હાલમાં તો તેને 3500 ડોલરના જામીન પર છોડવામાં આવ્યો છે.ઓ નીલ એક સ્થાનિક લોન્જમાં પોડકાસ્ટ શોની રેકોર્ડિંગ માટે ગયો હતો.
આ પહેલા પણ 2020માં ઓ નીલે કોરોનાની મહામારી દરમિયાન ફ્લાઈટમાં માસ્ક પહેરવાનો ઈનકાર કરીને વિવાદ સર્જયો હતો.જેના કારણે એરલાઈને તેના પર બેન મુક્યો હતો. 2016માં દારુ પીને ગાડી ચલાવવા બદલ પણ તેની ધરપકડ કરવામાં આવી હતી.બાદમાં તેની સામેના આરોપ પાછા ખેંચવામાં આવ્યા હતા.ઓ નીલે ઓસામાને મારવા માટે હાથ ધરાયેલા ઓપરેશન પર એક પુસ્તક પણ લખ્યુ છે અને તેમાં ઓપરેશનની તમામ જાણકારી તેણે આપી છે.અમેરિકન સરકારે આ પુસ્તકને નથી રદિયો આપ્યો કે નથી સમર્થન આપ્યુ.જોકે તેના સાથી કમાન્ડોએ ઓપરેશનનો ખુલાસો કરીને ઓ નીલે ગુપ્તતાનો ભંગ કર્યો હોવાનો આરોપ લગાવ્યો હતો.
