કચ્છના ગાંધીધામ ખાતે આજે નગરપાલિકાની સામાન્ય સભા દરમિયાન નગરપાલિકાના મહિલા પ્રમુખ પર શાહી ફેંકીને વિરોધ કરવામાં આવ્યો હતો.આજે સવારે 11 વાગ્યે સામાન્ય સભાનું આયોજન કરવામાં આવ્યું હતું.ત્યારે આ બેઠકમાં ભાગ લેવા પ્રમુખ ઈશીતાબેન ટાઉનહોલ પહોંચ્યા હતા.ત્યારે જ વોર્ડ નંબર 12ના રહેવાસીઓ અને કોંગ્રેસના નગરસેવકોએ તેમને દરવાજા પર અટકાવી દીધા હતા અને વિકાસ કામોના મુદ્દે રજૂઆતો કરી હતી.આ દરમિયાન મહિલા પ્રમુખના મોઢા પર શાહી ફેંકવામાં આવી હતી.
અચાનક બનેલી ઘટનાથી હેબતાઈ ગયેલા મહિલા પ્રમુખ ઈશીતાબેને આરોપ મૂક્યો હતો કે નગરપાલિકાના વિરોધ પક્ષના નેતા સમિત જોશી,જયશ્રીબેન ચાવડા સહિતના આગેવાનોએ તેમના પર આ હુમલો કર્યો છે.તેમને આક્ષેપ કર્યો હતો કે, આ રીતે તેઓ શાહી ફેંકી શકે છે તો ક્યારેક એસિડ વડે હુમલો પણ કરી શકે છે.શાહી ફેંકવાની ઘટનાની પોલીસને જાણ કરવામાં આવતા પોલીસ પહોંચી હતી.જોકે, સામાન્ય સભા શરૂ ન કરવા દેવાના કોંગ્રેસના નગરસેવકોનો પ્રયાસ વચ્ચે પોલીસને સાથે રાખી સામાન્ય સભા શરૂ કરવામાં આવી હતી, તેમાં વિકાસ કામોના વિવિધ ઠરાવો કરવામાં આવ્યા હતા.
આ દરમિયાન વિરોધ પક્ષના નેતા સમીપ જોશીએ જણાવ્યું હતું કે- તેમણે કરેલા કાળા કરતુતોના કારણે જ નાગરિકોએ તેમનું મોઢું કાળું કર્યું છે. આ ઘટનામાં કોંગ્રેસનો કોઈ હાથ નથી,લોકો વિકાસ કામોના મુદ્દે ખૂબ જ નારાજ છે.બહુમતી ધરાવતા ભાજપના શાસકો પોતાની બહુમતીના જોરે પોતાના જ વિકાસ કરે છે.
નોંધનીય છે કે, ગાંધીધામ નગરપાલિકામાં બહુમતી ધરાવતા ભાજપના શાસક પક્ષમાં પણ આંતરિક ડખ્ખો છે.થોડા સમય પહેલા ભાજપના જ નગરસેવક નગરપાલિકામાં મોરચો માંડ્યો હતો અને મહિલા પ્રમુખ સામે નારાજગી પણ વ્યક્ત કરી હતી.બીજી તરફ આ ઘટના બાદ ભાજપના સભ્યો બી ડીવીઝન પોલીસ મથક પહોંચા હતા.જે બાદ શાસક પક્ષના નેતાઓની મીટિંગ નગરપાલિકા ખાતે મળી હતી,જેમા આગળની કાર્યવાહી માટે ચર્ચા કરવામાં આવી હતી.
