બારડોલી : સુરત જિલ્લાના બારડોલી તાલુકાનાં કડોદ ખાતે આવેલ નાગરિક સહકારી ધિરાણ મંડળી લિમિટેડમાં કડોદ ગ્રામ પંચાયતના ડેપ્યુટી સરપંચ બિપિન પટેલે તેમના પિતાના શેર ટ્રાન્સફર માટે રજૂ કરેલ સંમતિ પત્રકમાં તેની બહેનની ખોટી સહી કરી હોવાની ફરિયાદ સંસ્થાના ડિરેક્ટરે પુરાવા સાથે સામાન્ય સભામાં રજૂ કરતાં વરસાઈનું કામની અરજી રદ્દ કરી અલગ અલગ જગ્યાએ આ અંગે ફરિયાદ કરતાં કડોદ વિસ્તારમાં રાજકીય ભૂકંપ સર્જાયો છે.
આ અંગે મળતી માહિતી અનુસાર બારડોલી તાલુકાનાં કડોદ ખાતે આવેલ કડોદ વિભાગ નાગરિક સહકારી ધિરાણ મંડળી લિમિટેડની સામાન્ય સભા ગત 21મી ઓક્ટોબરના રોજ મળી હતી.જેમાં કડોદ ગામના ડેપ્યુટી સરપંચ બિપિનચંદ્ર મોહનભાઈ પટેલે 14-10-2021ના રોજ તેમના પિતાના નામનો શેર પોતાના નામે તબદીલ કરવા અરજી કરી હતી. જે અરજી સાથે પેઢીનામું તેમજ મોહનભાઈના વારસદારોનું બિપિનભાઈના નામે શેર ટ્રાન્સફર કરવા માટેનું સંમતિપત્ર સોગંદનામું સાથે રજૂ કર્યું હતું.જે સંમતિ કરારમાં ખોટી સહી થઈ હોવાની ફરિયાદ સંસ્થાના ડિરેક્ટર સંજયભાઈ જગદીશભાઈ ભાવસારે સંસ્થાને કરી હતી.બિપિનભાઈના એક બહેન મનીષાબેન મોહનભાઈ પટેલ તે રવિન્દ્રભાઈ પટેલની પત્ની જે વર્ષોથી વિદેશમાં સ્થાયી થયા છે.જેઓ અહીં હાજર ન હોવા છતાં સંમતિ કરારમાં ખોટી તેમના નામની સહી કરી છેતરપિંડીનું કૃત્ય કર્યું હોવાનું બહાર આવ્યું છે અને સંસ્થાને મોટું નુકસાન કર્યું હોય તેવું જણાય આવ્યું છે.જેથી તેમની બિપિન પટેલની વરસાઈની અરજી રદ્દ કરી તેમના સામે કાયદાકીય પગલાં લેવા માટે બોર્ડની મિટિંગમાં ચર્ચા કરવા રજૂઆત કરવામાં આવી છે.
