બારડોલી : સુરત જિલ્લાના પલસાણા તાલુકાના કડોદરા ચાર રસ્તા પાસે આવેલી સુરત ડિસ્ટ્રીકટ કો-ઓપ.બેંકની શાખામાં ધોળાં દિવસે ચાર વાગ્યાના અરસામાં મોઢા પર માસ્ક પહેરી બેંકમાં પ્રવેશ કરી ડુપ્લીકેટ પિસ્તોલ જેવા હથિયારથી ચાર કર્મચારીને બાનમાં લઇ કેશમાંથી અંદાજિત 6,83,967 લાખ રૂપિયાની લૂંટ કરી નાસી છૂટ્યો હતો.આ ઘટનાને કારણે સુરત જિલ્લા પોલીસ દોડતી થઈ હતી.
મળતી માહિતી અનુસાર પલસાણા તાલુકાના કડોદરા ચાર રસ્તા નજીક વામદોત પેટ્રોલપંપની બાજુમાં આવેલ એક કોમ્પ્લેક્સમાં પહેલા માળે સુરત ડિસ્ટ્રીકટ કો-ઓપ.બેંકની કડોદરા શાખા આવેલી છે.સોમવારે સાંજે 4 વાગ્યાના અરસામાં બેંકમાં ગ્રાહકના સ્વાંગમાં એક યુવાન માથા પર ટોપી અને મોઢા પર માસ્ક પહેરીને ઘુસી આવ્યો હતો.પ્રથમ બેન્કના એટીએમ મશીન તરફ જઈ બેન્કની અંદરની પરિસ્થિતિનો તાગ મેળવ્યા બાદ સીધો બેન્કમાં પ્રવેશ્યો હતો.આ સમયે બેન્કમાં મેનેજર ધવલ પટેલ અન્ય એક પુરુષ કર્મચારી અને 2 મહિલા કર્મચારી મળી કુલ 4 કર્મચારીઓ હાજર હતા ત્યારે અચાનક લૂંટારુંએ તેની પાસેની થેલીમાંથી પિસ્તોલ જેવું હથિયાર બતાવી તમામ કર્મચારીઓના ફોન ફેંકાવી દીધા હતા ઘૂંટને બેસાડી દીધા અને તમામને બંધક બનાવી દીધા બાદ બેન્કમાંથી કેશ બારી પાસે જઈ એક બેગમાં 6,83,967 લાખ રૂપિયા લૂંટી બેન્કના મુખ્ય દરવાજાને તાળું મારી ભાગી છૂટ્યો હતો.ધોળા દિવસે ભરચક વિસ્તારમાં લૂંટ થવાની ઘટનાને લઈ એલ.સી.બી.,એસ.ઓ.જી.તેમજ સ્થાનિક પોલીસનો કાફલો ઘટના સ્થળે પહોંચી ગયો હતો.ઘટના અંગે કડોદરા બ્રાન્ચના મેનેજર ધવલ દિનેશભાઇ પટેલ(ઉ.વ.35,ઘર 20 પંચવટી સોસાયટી રહ્મ શોપિંગ સેન્ટર પરલે પોઇન્ટ સામે સુરત શહેર)નાઓએ કડોદરા GIDC પોલીસ મથકમાં ફરિયાદ કરી હતી
