માંડવી : સુરત જિલ્લાના માંડવી તાલુકાનાં કરંજ જી.આઈ.ડી.સી ખાતે 1.57 કરોડનો બાયોડિઝલનો શકાસ્પદ જથ્થો ગાંધીનગર સ્ટેટ મોનિટરિંગ સેલની ટીમે ઝડપી પાડ્યા બાદ સ્થાનિક પોલીસ ઉપર જિલ્લા પોલીસવડાએ ગજ વરસાવી હતી. માંડવીના ઇન્ચાર્જ પી.એસ.આઈ કે.ડી.ભરવાડ અને એલસીબીના પીએસ.આઈ વી.આર.દેસાઇને સસ્પેન્ડ કરી નાંખ્યા હતા. જ્યારે જિલ્લાના એલસીબી પી.આઈ બી.કે.ખાચરની કોસંબા ખાતે બદલી કરી નાંખી હતી.
સુરત જીલ્લામાં માંડવી તાલુકાનાં કરંજ ખાતે સ્ટેટ મોનિટરિંગ સેલની ટીમે એક ફેક્ટરીમાંથી 1.57 કરોડનું બાયોડિઝલ ઝડપી પાડ્યા બાદ સ્થાનિક પોલીસમાં ફફડાટ ફેલાય ગયો હતો.ગુજરાતનું સૌથી મોટું બાયોડિઝલ કૌભાંડ ઝડપાયું હોય સ્થાનિક પોલીસની સામે શંકાની સોય ઊભી થઈ હતી. જેને પગલે સુરત રેન્જના ડીજીપી રાજકુમાર પાંડિયન તેમજ જિલ્લા પોલીસવડા ઉષા રાડા નાઓએ બાયોડિઝલ કૌભાંડ બાદ સુરત જિલ્લા એલસીબીના પી.એસ.આઈ વી.આર.દેસાઇ તેમજ માંડવીના ઇન્ચાર્જ પી.એસ.આઈ કે.ડી.ભરવાડ નાઓને સસ્પેન્ડ કરી દીધા હતા.જ્યારે જિલ્લા એલસીબી પી.આઈ બી.કે.ખાચરની કોસંબા ખાતે બદલી કરી દેવામાં આવી હતી.કોસંબા પી.આઈ વી.કે. પટેલની એલઆઈબીમાં બદલી કરાઇ હતી.જ્યારે એલઆઈબી પી.આઈ આર.આર.વસાવાને ઓલપાડ ખાતે કાયમી બદલીનો હુકમ કરાયો છે.બીજી ઓફિસમાંથી કોઈ કાર્યવાહી થાય તે પહેલા જ જિલ્લાના બે પી.એસ.આઈને સસ્પેન્ડ કરી ત્રણ પી.આઈની આંતરિક બદલી કરી દેતા પોલીસબેડામાં ફફડાટ ફેલાય ગયો છે.
