કલમ 370 હટાવવા વિરુદ્ધ દાખલ કરવામાં આવેલી અરજી પર સુપ્રીમ કોર્ટ કરશે સુનાવણી

નવી દિલ્હી, 25 એપ્રિલ 2022,સોમવાર : સુપ્રીમ કોર્ટ જમ્મુ-કાશ્મીરમાંથી કલમ 370 હટાવવા વિરુદ્ધ દાખલ કરવામાં આવેલી અરજી પર સુનાવણી કરશે.કોર્ટમાં દાખલ કરાયેલી અરજીમાં જમ્મુ અને કાશ્મીરના બે કેન્દ્રશાસિત પ્રદેશોમાં પુનઃગઠન અને વિશેષ દરજ્જો નાબૂદ કરવા પર પણ સવાલો ઉઠાવવામાં આવ્યા છે.કોર્ટે અરજીની યાદી આપવાનું કહ્યું છે, અને જુલાઈમાં તેની સુનાવણી કરવા સંમતિ આપી દીધી છે.સીનિયર વકીલ શેખ નફાડેએ ચીફ જસ્ટિસની બેંચ સમક્ષ કહ્યું કે, આ આર્ટીકલ 370નો કેસ છે.હવે જમ્મુ-કાશ્મીરમાં પણ લોકસભા અને વિધાનસભા સીટોનું સીમાંકન ચાલી રહ્યું છે.જેના પર CJI NV રમન્નાએ કહ્યું, ‘હું જોઉં છું.’નાફડેએ કહ્યું કે, કલમ 370 નાબૂદને પડકારતી અરજીની સુનાવણી ઓછામાં ઓછી જુલાઈમાં ઉનાળાની રજાઓ પૂરી થયા પછી થવી જોઈએ.તેના પર ચીફ જસ્ટિસે કહ્યું કે, આ મુદ્દા પર રજાઓ બાદ વિચાર કરીશુ.આ કેસ 5 જજોની બેન્ચનો છે.આપણે બેન્ચ વગેરેનું પુનર્ગઠન કરવું પડશે.આર્ટીકલ 370 હટાવવાનો નિર્ણય 5 ઓગસ્ટ, 2019ના રોજ લેવામાં આવ્યો હતો, જમ્મુ અને કાશ્મીરના બે ભાગોમાં પુનર્ગઠન કરવામાં આવ્યું હતું. જે બાદ ડિસેમ્બર 2019 માં, કોર્ટમાં અરજીઓ દાખલ કરવામાં આવી હતી, જેની સુનાવણી જસ્ટિસ એનવી રમન્ના, જસ્ટિસ સંજય કિશન કૌલ, આર. સુભાષ રેડ્ડી, બીઆર ગવઈ અને સૂર્યકાન્તના કોર્ટમાં મોકલવામાં આવી હતી.તેમાંથી એક જસ્ટિસ આર. સુભાષ રેડ્ડી આ વર્ષે જાન્યુઆરીમાં નિવૃત્ત થઇ ગયા છે.એવું માનવામાં આવે છે કે તેમની નિવૃત્તિને કારણે મુખ્ય ન્યાયાધીશે કહ્યું કે, તેઓ બેન્ચની પુનઃરચના પર વિચાર કરશે, ત્યારબાદ કોર્ટમાં આ મુદ્દો ઊભો થયો કે શું આ અરજી 7 જજની બેન્ચ સમક્ષ મોકલવાની જરૂર છે? તેના પર કોર્ટે 2 માર્ચના પોતાના નિર્ણયમાં કહ્યું હતું કે, તેને મોટી બેંચ સમક્ષ મોકલવાની જરૂર નથી. ત્યારથી આ અરજીઓની લિસ્ટિંગ થઇ શકી નહી.