-તેની સાથે અન્ય 14 લોકો પણ ભારતથી ભાગી ISISમાં સામેલ થયા હતા
એજન્સી, કાબુલ
કાબુલમાં સિખો પર કરાયેલા આતંકી હુમલામાં સામેલ ચાર આતંકીઓ પૈકી એક 30 વર્ષનો દુકાનદાર હતો જે ચાર વર્ષ પહેલા કેરળના અન્ય 14 યુવકો સાથે ઇસ્લામિક સ્ટેટમાં સામેલ થવા ભારતથી ભાગ્યો હતો. ઇસ્લામિક સ્ટેટ સંગઠને શુક્રવારે એક તસ્વીર જાહેર કરી હતી, જે આત્મઘાતીની હતી. તે ચાર આતંકીઓ પૈકી એક હતો જેણે કાબૂલમાં ગુરુદ્વારા પર હુમલો કર્યો હતો. આ હુમલામાં 25 સિખોના મોત થયા હતા. અફઘાનમાં સિખો અલ્પસંખ્યક છે અને ખૂબ જ ઓછી વસ્તીવાળો સમુદાય છે.
કેરળના આતંકી વિરુદ્ધ ઇન્ટરપોલની નોટિસ પણ ઇશ્યુ થયેલી છે જ્યારે NIA પણ 2016થી તેની તપાસ કરી રહી છે. કેરળના કાસરગોડમાં રહેતા આઇએસના આતંકીના માતા-પિતાએ 2016માં તેની ગુમ થયાની પોલીસ ફરિયાદ નોંધાવી હતી. તેની સાથે અન્ય 14 લોકો ગુમ થયા હોવાની ફરિયાદ નોંધાવવામાં આવી હતી. જોકે તપાસમાં ખુલાસો થયો હતો કે તમામ ગુમ થયેલા ઇસ્લામિક સ્ટેટ આતંકી સંગઠનમાં જોડાઇ ચૂક્યા છે. તેઓને આઇએસમાં સામેલ કરવા માટે દિલ્હીની 29 વર્ષની યાસ્મીન જાહિદ જવાબદાર હતી,જે દિલ્હીના ઓખલા જામિયા નગર સ્થિત બાટલા હાઉસ વિસ્તારમાં રહેતી હતી. તે બિહારની રહેવાસી હતી.
NIAની તપાસમાં સામે આવ્યુ હતું કે કેરળનો રહેવાસી અબ્દુલ, યાસ્મીન અને અન્ય લોકો 2015 થી કેરળ અને ભારતના અન્ય રાજ્યોમાં આઇએસને સ્થાપવાના પ્રયત્નમાં હતા. જ્યારે હવે ખુલાસો થયો છે કે અફઘાનિસ્તાનમાં ગુરુદ્વારા પર થયેલા હુમલામાં કેરળનો રહેવાસી આતંકી સામેલ હતો.
