મુંબઈ : મહારાષ્ટ્રના મુખ્યમંત્રી ઉદ્ધવ ઠાકરેને લઈને કેન્દ્રીય મંત્રી નારાયણ રાણેની વાંધાજનક ટિપ્પણીના મુદ્દો વધુ ગરમાયો છે.કેન્દ્રીય મંત્રી નારાયણ રાણેએ ઉદ્ધવ ઠાકરેને લાફો મારવાનું નિવેદન કર્યું છે જેને પગલે તેમની સામે નાશિકમાં એફઆઈઆર નોંધાઈ છે અને કેન્દ્રીય મંત્રીની ધરપકડ કરવા માટે ડીસીપીની આગેવાનીમાં ટીમની રચના પણ કરવામાં આવી છે.બીજીતરફ મુંબઈમાં શિવસેના અને ભાજપના કાર્યકરો આમને-સામને આવી ગયા છે.મામલો એટલી હદે ગરમાયો હતો કે પોલીસને લાઠીચાર્જ કરવાની ફરજ પડી છે.શિવસેનાના કાર્યકર્તાઓ રાણેના ઘર સુધી માર્ચ યોજી રહ્યા હતા. આ સમગ્ર મુદ્દે નારાયણ રાણેએ જણાવ્યું કે તેમની ધરપકડ અંગે તેમને કોઈ માહિતી નથી અને તેમણે કોઈ ગુન્હો કર્યો નથી.
નાશિક પોલીસ કમિશનર દીપક પાંડેએ મુખ્યમંત્રી ઉદ્ધવ ઠાકરેની વિરુદ્ધ વાંધાજનક નિવેદન બદલ મંગળવારે કેન્દ્રીય મંત્રીની તાત્કાલિક ધરપકડના આદેશ આપ્યા છે.રાણે વિરુદ્ધ એફઆઈઆર દાખલ થયા બાદ તેમણે આ આદેશ આપ્યા હતા.અધિકારીએ જણાવ્યું કે, આદેશ બાદ નાશિક પોલીસની એક ટીમ સવારે રત્નાગિરી જવા રવાના થઈ છે.ઉલ્લેખનીય છે કે રાણે અહીં તેમની જન આર્શીવાદ યાત્રા માટે હાજર રહેવાના છે.
રાણેએ દાવો કર્યો હતો કે સ્વતંત્રતા દિવસના અવસરે ઠાકરે તેમના સંબોધનમાં ભૂલી ગયા કે દેશની આઝાદીને કેટલા વર્ષો થયા હતા અને આ સંદર્ભમાં કેન્દ્રીય મંત્રીએ વિવાદાસ્પદ ટિપ્પણી કરી હતી.
‘મેં કોઈ ગુન્હો નથી કર્યો’
કેન્દ્રીય મંત્રી નારાયણ રાણેએ જણાવ્યું કે, મારા વિરુદ્ધ એફઆઈઆર દાખલ થઈ છે તે અંગે મને જાણ નથી. મે કોઈ અફરાધ કર્યો નથી. 15 ઓગસ્ટ અંગે કોઈને માહિતી નથી તો શું તે ગુન્હો નથી ગણાતો. મે કહ્યું હતું કે, તમાચો ઝીંકી દેત અને તે ગુન્હો નથી. હું મીડિયાને વિનંતી કરું છું કે તેઓ સત્યની ચકાસણી કર્યા બાદ અહેવાલ દર્શાવે, મે કોઈ ગુન્હો નથી કર્યો છતાં મારી ધરપકડની અટકળોના અહેવાલ રજૂ કરવામાં આવે છે.હું કોઈ સામાન્ય વ્યક્તિ છું?
કેન્દ્રીય મંત્રી નારાયણ રાણેએ રાયગઢ જિલ્લામાં સોમવારે આર્શીવાદ યાત્રા દરમિયાન કહ્યું કે, આ શરમજનક છે કે મુખ્યમંત્રીને એટલું જ્ઞાન નથી કે આઝાદીને કેટલા વર્ષો થયા.ભાષણ વખતે તેઓ પાછળ વળીને એવું પૂછતા નજરે પડ્યા હતા કે હું ત્યાં હાજર હોત તો તેમને એક જોરદાર તમાચો ઝીંકી દેત.રાણેએ દાવો કર્યો હતો કે ઠાકરે ભૂલી ગયા હતા આઝાદીને કેટલા વર્ષ થયા અને ચાલુ ભાષણ વચ્ચે તેઓ સહયોગીને આ બાબતે પૂછી રહ્યા હતા.
રાણેના નિવેદન બાદ શિવસેનાના નાશિક એકમના પ્રમુખે સાયબર પોલીસ સ્ટેશનમાં ફરિયાદ દાખલ કરાવી હતી.પોલીસના એક અધિકારીના મતે ફરિયાદને આધારે નાશિકમાં રાણે વિરુદ્ધ આઈપીસીની કલમ 500, 505, 153-બી(1)(સી) હેઠળ એફઆઈઆર દાખલ થઈ હતી.
