દિલ્હીમાં તોફાન કરવા માટે ઉશ્કેરવાના આરોપમાં ધરપકડ કરી
એજન્સી, નવી દિલ્હી
કોંગ્રેસના પૂર્વ મ્યુનિ. કોર્પોરેટર ઈશરત જહાંને દિલ્હી પોલીસે દિલ્હીમાં તોફાન કરવા માટે ઉશ્કેરવાના આરોપમાં ધરપકડ કરી લીધી છે. ઈશરતને 14 દિવસ સુધી ન્યાયિક કસ્ટડીમાં મોકલવામાં આવી છે. તે છેલ્લા 50 દિવસથી દિલ્હીના ખુરેજીમાં સીએએ વિરુદ્ધ દેખાવો કરી રહી હતી. ગયા રવિવારના રોજ ખુરેજી રોડ જામ કરવા પાછળ પણ ઈશરતનું નામ લેવાઈ રહ્યું હતું.
ઉલ્લેખનીય છે કે નાગરિકતા સુધારણા કાયદાના મામલે હિંસા ભડક્યા બાદ શનિવારના રોજ ઉત્તર પૂર્વ દિલ્હીમાં મોટાભાગના સ્થળો પર વાતાવરણ શાંતિપૂર્ણ છે. જોકે, જે સ્થળો પર હિંસા થઈ છે તેની આસપાસના વિસ્તારોમાં અત્યાર સુધીમાં 43 જેટલા લોકોના મોત નિપજી ચૂક્યા છે. આ અથડામણમાં મોટી સંખ્યામાં લોકો ઈજાગ્રસ્ત પણ થયા છે.
ગૃહ મંત્રાલયના જણાવ્યા અનુસાર ઉત્તરી દિલ્હી નગર નિગમે જાહેર સ્થળોએથી મોટાભાગના કાટમાળ હટાવી દીધો છે. હિંસામાં 300થી વધારે લોકો ઈજાગ્રસ્ત થયા છે. આ મામલે પોલીસે અત્યાર સુધીમાં 123 એફઆઈઆર નોંધી છે અને 630 લોકોની ધરપકડ કરી લીધી છે. દિલ્હી પોલીસે હિંસાના મામલામાં તપાસ માટે બે એસઆઈટી બનાવી છે.
24 ફેબ્રુઆરીના બાદથી ઉત્તર પૂર્વ દિલ્હીના હિંસા પ્રભાવિત વિસ્તારોમાં સાત હજારથી વધારે સુરક્ષા જવાનો ગોઠવવામાં આવ્યા છે. તેમજ પ્રાપ્ય જાણકારી પ્રમાણે પોલીસ પાસેથી મદદ માગવા માટેના હેતુથી આશરે સાડા ત્રણ હજાર લોકોએ પોલીસને કોલ્સ કર્યા હતા પરંતુ આ કોલ્સનો પોલીસે કોઈ જ જવાબ આપ્યો નહતો. આ કોલ્સના જવાબ પોલીસે કેમ નહતા આપ્યા તે માટે પોલીસ પર પણ તપાસ થઈ રહી છે.
