નવી દિલ્હી, તા. ૧૭ : હનુમાન જન્મોત્સવ પ્રસંગે દેશમાં અનેક જગ્યાએ શોભાયાત્રા પર પથ્થરમારાના પગલે કોમી તોફાનોથી તંગદિલી ફેલાઈ છે.એવા સમયે રાજસ્થાન અને દિલ્હીમાંથી ધાર્મિક સદ્ભાવનાનું ઉત્તમ ઉદાહરણ સામે આવ્યું છે.દિલ્હીમાં એકબાજુ જહાંગીરપુરમાં પથ્થરમારો થયો તો બીજીબાજુ એ જ સમયમાં મંગોલપુરીમાં મસ્જિદ પરથી હનુમાન ભક્તો પર ફુલો વરસાવાયા હતા.ભારતની વિવિધ સંસ્કૃતિઓની ઝાંકી શનિવારે દિલ્હીના મંગોલપુરીમાં જોવા મળી હતી.દિલ્હીમાં એકબાજુ જહાંગીરપુરીમાં હનુમાનજીની શોભાયાત્રા પર પથ્થરમારો થયો હતો.બીજીબાજુ મંગોલપુરીમાં એક મસ્જિદ સામેથી પસાર થઈ રહેલી શોભાયાત્રાને મુસ્લિમ સમાજે આવકારી હતી અને મસ્જિદની અંદર તથા બહારથી પુષ્પવર્ષા કરી તેનું ઉત્સાહપૂર્ણ સ્વાગત કર્યું હતું.શોભાયાત્રા પર મુસ્લિમો દ્વારા ફૂલ વરસાવવાનો વીડિયો પણ સોશિયલ મીડિયા પર વાઈરલ થયો હતો.બીજીબાજુ રાજસ્થાનના કોટામાં સ્થાનિક મુસ્લિમોએ પણ હનુમાનજીની શોભાયાત્રા પર ફૂલો વરસાવ્યા હતા અને હનુમાન ભક્તોને ઠંડુ પાણી અને શરબત આપ્યા હતા. દેશવાસીઓને સદ્ભાવનાનો સંદેશ આપતા કોટાના ખેરાબાદ ગામમાં હનુમાન મંદિરેથી શનિવારે સાંજે હનુમાનજીની શોભાયાત્રા નીકળી હતી.તેના બે કિ.મી. લાંબા માર્ગમાં બે મસ્જિદો આવે છે.રામગંજ મદનીમાં એક મસ્જિદ બહાર શોભાયાત્રા પહોંચી ત્યારે હિન્દુ સમાજ સાથે કેટલાક મુસ્લિમ યુવાનોએ તેમની પરંપરાગત માર્શલ આર્ટના કરતબ કર્યા હતા.મુસ્લિમોએ ફૂલોની માળા પહેરાવી શાભાયાત્રાને આવકારી હતી.
કોટા-મંગોલપુરીમાં મુસ્લિમોએ શોભાયાત્રા પર ફૂલ વરસાવ્યા
