અમદાવાદ : એક તરફ પોલીસ કમિશનર સંજય શ્રીવાસ્તવ દારૂ મુક્ત અમદાવાદ બનાવવા માટે પ્રયાસ કરી રહ્યા છે.તેમણે શહેર પોલીસને દારૂ-જુગારના આડ્ડાઓ બંધ કરાવી દેવા માટે આદેશ આપી ખાસ કવાયત શરૂ કરાવી છે.ત્યારે જ એરપોર્ટ પોલીસે પોતાની હદમાં દેશી દારૂની ભઠ્ઠીઓ શરૂ કરાવી દીધી હતી.જે અંગેની વિગતો પીસીબી પી.આઇ.તરલ ભટ્ટને મળી હતી.જેને પગલે પીસીબીની ટીમે કોતરપુર નજીક નદીના પટમાં ધમધમતી દારૂની ભઠ્ઠીઓ પર દરોડા પાડીને જમીનમાં દાટેલા ૧૦૦ પીપ ભરીને દેશી દારૂનો વોશ અને મોટા પ્રમાણમાં અખાદ્યા ગોળ કબજે લીધો હતો.જ્યારે દારૂની ભઠ્ઠી ચલાવતા બે બૂટલેગરોની તલાશ શરૂ કરી છે.
અમદાવાદ એરપોર્ટ પોલીસ મથક જાણે કે અમદાવાદ શહેર પોલીસ કમિશનર સંજય શ્રીવાસ્તવના તાબામાં ના હોય તેવો ઘાટ થયો છે.શહેરભરમાં દારૂનું દૂષણ ધીરે ધીરે દૂર થઇ રહ્યું છે.ત્યારે જ એરપોર્ટ પોલીસે કોતરપુર નદીના પટમાં દેશી દારૂની ભઠ્ઠીઓ શરૂ કરાવી હતી.શહેર પોલીસ અને તમામ એજન્સીઓ હાલ રથયાત્રાના બંદોબસ્તમાં વ્યસ્ત હોવાથી એરપોર્ટ પોલીસે કમિશનરના આદેશનું ઉલ્લંઘન કરી દારૂની ભઠ્ઠીઓ શરૂ કરાવી દીધી હતી.જોકે દારૂની ભઠ્ઠીઓ શરૂ થઇ ગઇ હોવાની વિગતો પીસીબી પોલીસ ઇન્સ્પેકટર તરલ ભટ્ટ અને તેમની ટીમને મળી હતી.જેને પગલે તેમણે રેડ કરીને મોટા પ્રમાણમાં દેશી દારૂ માટેના પદાર્થો ઝડપી લીધા હતા.જ્યારે કમલાબેન ભરવસિંહ માલાવત અને ધર્મેન્દ્ર ઉર્ફે શેરૂ ભવરસિંહ મલાવત(બન્ને રહે.નોબલનગર,અમદાવાદ)ને વોન્ટેડ જાહેર કરી તેમને ઝડપી લેવા કવાયત શરૂ કરી છે.
