। ન્યૂયોર્ક ।
કોરોના વાઇરસના પ્રકોપને કારણે અમેરિકાની ઇકોનોમી અનિશ્ચિતતાના સમયમાં પસાર થઈ રહી છે. દેશભરમાં વ્યાપાર ઠપ્પ થઈ ગયો છે. વ્યવસાયિક અને આર્થિક ગતિવિધિઓના કેન્દ્ર ગણાતા ન્યૂયોર્કની સ્થિતિ વધુ ચિંતાજનક છે. આ સ્થિતિ કેટલી હદે બગડશે એ કહી શકાય એમ નથી. ઓક્સફર્ડ ઇકોનોમિક્સના પ્રમુખ અમેરિકન અર્થશાસ્ત્રી ગ્રેગ ડેકોનું કહેવું છે કે, અર્થવ્યવસ્થામાં વર્ષની પહેલી ત્રિમાસિકમાં ૦.૪ ટકા, બીજી ત્રિમાસિકમાં ૧૨ ટકા સુધીનો ઘટાડો આવી શકે છે. અર્થવ્યવસ્થાના આવા હાલ આ પહેલાં ક્યારેય જોવા મળ્યા નથી. ન્યૂયોર્ક સહિત તમામ મુખ્ય શહેરો લગભગ લોકડાઉનમાં છે. ન્યૂયોર્ક રાજ્યમાં જરૂરી સેવાઓ સિવાયના તમામ કામદારોને ઘરમાં જ રહેવા માટે સૂચના અપાઈ છે. યુદ્ધના સમયે પણ એવું સંકટ પેદા થયું હતું. એ મહામંદીથી પણ આગળ જઈ શકે છે.
મોર્ગન સ્ટેન્લી બેન્કની મુખ્ય અર્થશાસ્ત્રી એલન જેટનર કહે છે કે, પહેલાં ક્યારેય પણ કોઈ મંદી વખતે લોકોને બહાર નીકળવા માટે રોકવામાં આવ્યા ન હતા.
તેમનું કહેવું છે કે મોટી કંપનીઓની સરખામણીએ નાની કંપનીઓ પર જબરદસ્ત માર પડશે. જાન્યુઆરી સુધી ઇકોનોમી પૂરી ગતિથી દોડતી હતી, પણ હવે તે થંભી ગઈ છે.
૨૦ ટકા બેરોજગારીની આશંકા । અમેરિકાના શ્રમ વિભાગે જણાવ્યું હતું કે ગયા અઠવાડિયે બેરોજગારીનો દર વધીને ૩૦ ટકાએ પહોંચી ગયો છે. કંપનીઓ છટણી કરી રહી છે. છટણી કરાયેલા લોકોની સંખ્યા ૨.૮૧ લાખ હતી. હવે એ સંખ્યા તો ખૂબ જ નાની લાગે છે. ગોલ્ડમેન સોક્સનો દાવો છે કે આવતા અઠવાડિયા સુધી આંકડો ૨૨ લાખ ઉપર પહોંચવાનો અંદાજ છે. ડેકોનું કહેવું છે કે બેરોજગારોની દર એપ્રિલમાં ૧૦ ટકા થઈ શકે છે, એ હિસાબે જોઈએ તો ૧.૬૦ કરોડ વ્યક્તિઓ નોકરી ગુમાવશે.
