અમદાવાદ : રાજ્યમાં કોરોનાના કેસમાં સતત પાંચમાં દિવસે વધારો જોવા મળ્યો છે.ગુરુવારે રાજ્યભરમાં કોરોનાના એક્ટિવ કેસમાં ૨૪૭ કેસના વધારા સાથે આંકડો ૩૩૦૦ની નજીક એટલે કે,૩૨૮૯ને આંબી ગયો છે.જેમાં કોવિડના નવા ૬૩૨ કેસનો સમાવેશ થાય છે.વલસાડના એક દર્દીનું કોવિડથી મોત નિપજ્યું છે.ગુરુવારની સરખામણીએ શુક્રવારે નવા કેસોમાં ૧૦૫નો તોતીંગ વધારો નોંધાયો હતો.જોકે,સાજા થનારા દર્દીઓની સંખ્યા ગઈકાલની સરખામણીએ ઘટી છે અને શુક્રવારે ૩૮૪ દર્દીએ કોરોનાને મ્હાત આપી છે.દર્દીઓની વિગતવાર સંખ્યા જોઈએ તો અમદાવાદ શહેરમાં ગઈકાલના ૨૨૨ કેસમાં ૩૬ના વધારા સાથે ૨૫૮ અને જિલ્લાના ચાર મળી કુલ ૨૬૨ કેસ સાથે મોખરે છે.ગાંધીનગર મહાનગરપાલિકામાં રાતોરાત ચોંકાવનારા ૩૨ કેસ નોંધાયા છે.સુરત શહેરમાં ૮૫ અને જિલ્લામાં ૧૮ જ્યારે વડોદરા શહેરમાં ૪૨ તો જિલ્લામાં ચાર નવા કેસ નોંધાયા છે.
જોકે,બોટાદ,જામનગર અને પોરબંદર સહિત ૧૦ જિલ્લામાં કોરોનાનો નવો એક પણ દર્દી નોંધાયો નથી,જે તંત્ર માટે રાહતરૂપ બાબત ગણાશે.છેલ્લા ૨૪ કલાકમાં નોંધાયેલા નવા ૩૨૮૯ એક્ટિવ કેસમાં અમદાવાદ,સુરત અને વડોદરા સિવાયના અન્ય મહાનગરો-જિલ્લાઓની સ્થિતિ જોઈએ વલસાડમાં કોરોનાનું સંક્રમણ આગળ ધપી રહ્યું છે અને ગઈકાલના ૨૨ કેસ સામે આજે ૩૨ કેસ નોંધાયા છે.
સાણામાં પણ કેસો વધીને ૩૦,નવસારીમાં ૧૮,ગાંધીનગર જિલ્લામાં ૧૧,પાટણમાં ૧૧,રાજકોટ શહેરમાં ૧૪ અને જિલ્લામાં સાત,કચ્છમાં ૧૪,પાટણમાં ૧૧ ભાવનગર શહેરમાં ૮ અને જિલ્લામાં ૨,દેવભૂમી દ્વારકા અને રાજકોટમાં ૭-૭,સાબરકાંઠામાં ૬,ભરૂચમાં પાંચ,આણંદ,મોરબીમાં ૪-૪,અમરેલી,ખેડા અને સુરેન્દ્રનગરમાં બબ્બે,બનાસકાંઠા,દાહોદ,ગીર સોમનાથ,પંચમહાલ અને તાપીમાં એક-એક નવા કેસ નોંધાયા છે.સરકારે જાહેર કરેલી યાદી મુજબ છેલ્લા ૨૪ કલાકમાં ૩૮૪ દર્દી કોરોનાને મ્હાત આપીને સાજા થયા છે જ્યારે કુલ એક્ટિવ કેસમાંથી ૩૨૮૯ દર્દીની સ્થિતિ સ્ટેબલ જ્યારે છ દર્દી વેન્ટિલેટર પર છે.
રાજ્યમાં અત્યારસુધીમાં કુલ ૧૨,૧૮,૪૨૬ દર્દી સારવાર લઈને ડિસ્ચાર્જ થયા છે.કોરોના સંક્રમિત એક દર્દીનું મૃત્યુ થતા અત્યારસુધીમાં કુલ ૧૦,૯૪૭ લોકોના મૃત્યુ નિપજ્યાં છે.કોરોનાના નવો વેરિયન્ટની ઝપટમાં નવા લોકો આવી રહ્યા છે,છતાં સ્થિતિ નિયંત્રણમાં હોવાનો દાવો થઈ રહ્યો છે,છતાં એક્ટિવ કેસની સંખ્યામાં જોવા મળી રહેલો વધારો ચિંતા ઉપજાવનારો છે.
