કોરોનામાં કેન્દ્રની બેદરકારીથી ૪૦ લાખ લોકોનાં મોત થયા : રાહુલ

નવી દિલ્હી, તા. ૧૭ : દેશમાં કેન્દ્ર સરકારની બેદરકારીના કારણે કોરોના મહામારી દરમિયાન ૪૦ લાખ ભારતીયોના મોત થયા હોવાનો કોંગ્રેસ નેતા રાહુલ ગાંધીએ રવિવારે દાવો કર્યો હતો.આ સાથે રાહુલ ગાંધીએ ફરી એક વખત મૃતકોના પરિવારોને ચાર-ચાર લાખ રૂપિયાનું વળતર આપવાની માગણી કરી હતી.બીજીબાજુ ભારત સરકારે કોરોનાથી મોત મુદ્દે ડબલ્યુએચઓની ગણતરી સામે સવાલ ઉઠાવ્યા હતા.
રાહુલ ગાંધીએ ટ્વીટર પર ન્યૂયોર્ક ટાઈમ્સના એક રિપોર્ટનો સ્ક્રીનશોટ શૅર કર્યો, જેમાં દાવો કરાયો હતો કે ભારત કોરોનાથી થયેલા મોતના આંકડાને જાહેર કરવાના ડબલ્યુએચઓના પ્રયાસોમાં અવરોધો ઊભા કરી રહ્યું છે.આ અહેવાલને ટાંકીને રાહુલે જણાવ્યું કે, મોદીજી સાચું તો નથી બોલી રહ્યા, પરંતુ બીજાને પણ સાચું બોલતા રોકી રહ્યા છે.તેઓ હજુ પણ ખોટું બોલે છે કે ઓક્સિજનની અછતના કારણે કોઈનું મોત નથી થયું. ભૂતપૂર્વ કોંગ્રેસ અધ્યક્ષે કહ્યું કે મેં પહેલાં પણ કહ્યું હતું કે કોરોના દરમિયાન સરકારની બેદરકારીના કારણે પાંચ લાખ નહીં પરંતુ ૪૦ લાખ ભારતીયોના મોત થયા છે.પોતાની જવાબદારી પૂરી કરો, મોદીજી – દરેક પીડિત પરિવારને ચાર-ચાર લાખ રૂપિયાનું વળતર આપે.હકીકતમાં ભારતે કોરોનાથી મોતનો અંદાજ કરનારી વિશ્વ આરોગ્ય સંસ્થા ડબલ્યુએચઓની કાર્યપ્રણાલી પર સવાલ ઊઠાવતા કહ્યું કે આ પ્રકારના ગાણિતિક મોડલિંગનો ઉપયોગ ભૌગોલિક આકાર અને જનસંખ્યાના આટલા વિશાળ રાષ્ટ્ર માટે મૃત્યુના આંકડાનો અંદાજ લગાવવા માટે કરી શકાય નહીં. કેન્દ્રીય સ્વાસ્થ્ય મંત્રાલયે ૧૬ એપ્રિલે ‘ઈન્ડિયા ઈઝ સ્ટોલિંગ ડબલ્યુએચઓસ એક્સપર્ટ્સ ટુ મેક ગ્લોબલ કોવિડ ડેથ ટોલ પબ્લિક’ મથાળાવાળા લેખના જવાબમાં આ નિવેદન આપ્યું હતું.આ અહેવાલમાં જણાવાયું હતું કે, ભારતે અનેક પ્રસંગે ઉપયોગમાં લેવાતી કાર્યપ્રણાલી પર વૈશ્વિક સ્વાસ્થ્ય એકમ સાથે તેની ચિંતાઓ શૅર કરી છે.કોંગ્રેસનો આક્ષેપ છે કે સરકારે કોરોનાથી મોતના વાસ્તવિક આંકડા જાહેર કર્યા નથી અને મૃતકોના પરિવારના સભ્યોને ચાર-ચાર લાખ રૂપિયાનું વળતર આપવા પણ માગણી કરી છે.સરકારના દાવા મુજબ દેશમાં કોરોનાથી મરનારા લોકોની સંખ્યા ૫,૨૧,૭૫૧ છે.