નવી દિલ્હી : ગૃહમંત્રી અમિત શાહે વીજ મંત્રી આર કે સિંઘ અને કોલસા મંત્રી પ્રહલાદ જોશીને મંગળવારે મળીને દેશમાં કોલસાની સ્થિતિ અને તંગીના અહેવાલોની ચર્ચા કરી હતી. બેઠકમાં એનટીપીસી, વીજ અને કોલસા મંત્રાલયના અધિકારીઓ પણ હાજર રહ્યા હતા.અહેવાલમાં જણાવ્યા અનુસાર દેશના ૧૩૫ કોલસા આધારિત પ્લાન્ટ્સમાંથી ૫૦ ટકા પાસે ત્રણ કરતાં પણ ઓછા દિવસ ચાલે તેટલો કોલસાનો જથ્થો છે. આ ૧૩૫ પ્લાન્ટ્સ દેશને લગભગ ૭૦ ટકા વીજ પુરવઠો પૂરો પાડે છે. ઉલ્લેખનીય છે કે, વૈશ્વિક સ્તરે ઊર્જાની તંગી છે અને ભાવોમાં સતત વધારો થઈ રહ્યો છે. ભારતમાં ૮ ઓક્ટોબરના રોજ વીજ વપરાશ ૩,૯૦૦ એમયુ હતો,જે ચાલુ મહિને (૧થી ૯ ઓક્ટોબર) સૌથી વધુ છે.કોલસાની તંગી અને ઊંચો વપરાશથી સત્તાવાળા ચિંતિત બન્યા છે.
ટાટા પાવરની સબસિડિયરી ટાટા પાવર દિલ્હી ડિસ્ટ્રિબ્યુશને ગ્રાહકોને ફોન દ્વારા સંદેશ મોકલી જણાવ્યું હતું કે, ઉત્તર ભારતમાં વીજ ઉત્પાદન પ્લાન્ટ્સમાં કોલસાની મર્યાદિત ઉપલબ્ધતાને કારણે બપોરે બે વાગ્યાથી છ વાગ્યા સુધીના ગાળામાં વીજ વપરાશ ઘણા ઊંચા સ્તરે હોય છે.વીજળી ધ્યાનથી વાપરો.જવાબદાર નાગરિક બનો. અગવડ બદલ ખેદ છે – ટાટા પાવર ડીડીએલ.’
જોકે, કોલસા મંત્રાલયે દેશમાં ઇંધણનો પૂરતો જથ્થો હોવાની ખાતરી આપી છે.મંત્રાલયે ભારપૂર્વક જણાવ્યું હતું કે, વીજ પુરવઠો ખોરવાઈ જવાની આશંકા બિલકુલ નિરર્થક છે. ઉલ્લેખનીય છે કે, એનટીપી પાસે એક-બે દિવસનો કોલસાનો જથ્થો હોવાથી તેના મોટા ભાગના પ્લાન્ટ્સ ૫૫ ટકા ક્ષમતાએ ચાલી રહ્યા છે.
