ગવર્નર શક્તિકાંત દાસે હાથ ખંખેર્યા, MPCની 3 એપ્રિલે યોજાનારી બેઠકમાં વ્યાજના દર ઘટશે તેવો સંકેત
એજન્સી > નવી દિલ્હી
રિઝર્વ બેન્કના ગવર્નર શક્તિકાંત દાસે સોમવારે કહ્યું હતું કે કોરોના વાયરસને પગલે જે પરિસ્થિતિ ઊભી થઈ છે તેમાં અર્થતંત્રને ગતિ આપવા માટે વ્યાજના દર ઘટાડવા કે નહીં તેનો નિર્ણય મોનિટરી પોલિસી કમિટી(MPC) કરશે. જોકે આમ કહીને તેમણે આગામી 3 એપ્રિલે યોજાનારી MPCની બેઠકમાં વ્યાજના દર ઘટી શકે છે તેવો સંકેત આપ્યો હતો. બજારમાં તરલતા વધારવા માટે વ્યાજના દરમાં ઘટાડો જરૂરી બન્યો હોવાનું મનાય છે.
દાસે મુંબઈમાં સોમવારે સાંજે પત્રકાર પરિષદ સંબોધી હતી. ભારતીય શેરબજારનો સંવેદનશીલ સૂચકાંક સેન્સેક્સ સોમવારે 2713 પોઈન્ટ ગગડ્યો હતો અને આ સંજોગોમાં રિઝર્વ બેન્કની ઉતાવળે બોલાવાયેલી પ્રેસ કોન્ફરન્સમાં અપેક્ષા એવી હતી કે બજારલક્ષી કોઈ મોટી જાહેરાત દાસ કરશે. પરંતુ એવું થયું ન હતું. ખાસ કરીને વ્યાજના દર ઘટાડાશે તેવી પ્રબળ અટકળ વહેતી થઈ હતી. વ્યાજના દર શા માટે 5.15 ટકા યથાવત્ રાખવામાં આવ્યા તેવા સવાલના જવાબમાં દાસે કહ્યું હતું કે ‘કાયદા મુજબ રેટ કટનો નિર્ણય MPC મારફતે જ લેવાય, તેમ છતાં મેં કોઈ શક્યતા નકારી નથી. સ્થિતિ ઊભી થશે તે મુજબ અમે સમયસર પગલાં લઈશું.’
શક્તિકાંત દાસે હાલના તબક્કે નાણાકીય બજારને સ્થિર કરવા માટે 2 અબજ ડોલરના મૂલ્યના અમેરિકન ડોલર સેલ/બાય સ્વેપ 23 માર્ચે હાથ ધરવાની જાહેરાત કરી છે. આ ઉપરાંત ~1 લાખ કરોડના મૂલ્યના લોંગ ટર્મ રેપો ઓપરેશન તબક્કાવાર યોજવાની જાહેરાત પણ કરી હતી. તેમણે કહ્યું કે રિઝર્વ બેન્ક નીતિગત જાહેરાતની મહત્તમ અસર થાય અને ઈચ્છિત પરિણામ આવે તેવા પ્રયાસ કરશે.
જોકે વૈશ્વિક સ્તર પર અમેરિકન ફેડરલ સહિતની સેન્ટ્રલ બેન્કોએ વ્યાજના દર ઘટાડ્યા છે છતાં બજાર પર તેની કોઈ જ અસર જોવા મળી નથી. કોરોનાને પગલે તાજેતરના દિવસોમાં અમેરિકન ફેડરલ સહિત 43 દેશોની સેન્ટ્રલ બેન્કોએ વ્યાજના દરમાં ઘટાડો જાહેર કર્યો છે. તેમાં યુરોપીયન સેન્ટ્રલ બેન્ક અને બેન્ક ઓફ ઈંગ્લેન્ડનો પણ સમાવેશ થાય છે. તેમણે આ સાથે કહ્યું હતું કે ખાનગી બેન્ક યસ બેન્ક 18 માર્ચે મોરેટોરિયમમાંથી બહાર આવી જશે. તેમણે ફરી કહ્યું હતું કે યસ બેન્કના તમામ થાપણદારોના નાણાં સંપૂર્ણ સલામત છે અને કોઈ જ ચિંતા કરવાની જરૂર નથી. કોરોના વાયરસને કારણે સમગ્ર વિશ્વમાં ગભરાટ વ્યાપી ગયો છે અને રોકાણકારો તમામ એસેટ ક્લાસમાં વેચવાલી કરી રહ્યા છે. આવા સંજોગોમાં ઈક્વિટી માર્કેટમાં ભારે ધોવાણ થઈ ગયું છે. સલામત ગણાતા સોના-ચાંદીમાં પણ કડાકા બોલી ગયા છે.
